काठमाडौं महानगरपालिकाको मेयर पदमा स्वतन्त्र उम्मेदवार बालेन शाहले अग्रता बढाइरहँदा एमालेका उम्मेदवार केशव स्थापितसँग काँग्रेस उम्मेदवार सिर्जना सिंहले भने मतान्तर घटाएकी छन् । अहिले यी दुई उम्मेदवार बीचको मतान्तर ३५६ रहेको छ । शनिबार बिहान मुख्य निर्वाचन अधिकृतको कार्यालयले दिएको आधिकारिक जानकारी अनुसार स्वतन्त्र उम्मेदवार बालेन शाहले ३१ हजार १४५ मत पाएका छन् । 

तर एमालेका उम्मेदवार केशव स्थापितले १६ हजार ९१८ मत पाउँदा काँग्रेसकी सिर्जना श्रेष्ठले  १६ हजार ५६२ मत पाएकी हुन् । यसअघि स्थापितसँग समेत फराकिलो मतान्तर रहेकामा सिर्जनाको नतिजामा केही सुधार देखिएको हो ।   
यसैगरी उपमेयरमा एमालेकी सुनिता डंगोलले ३१ हजार १११ मत पाएकी छन् । तर, सत्ता गठबन्धनबाट उम्मेदवार बनेका एकीकृत समाजवादी पार्टीका रामेश्वर श्रेष्ठले १० हजार ६७३ मत मात्र पाएका छन् । 
मुख्य निर्वाचन अधिकृतको कार्यालयका शाखा अधिकृत प्रेम कुमार श्रेष्ठले राष्ट्रियसभा गृहमा मतगणना जारी रहेको जानकारी दिए । उनका अनुसार बिहान ७ बजेसम्मको मतगणनाको विवरण आधिकारिकरुपमा सार्वजनिक गरिएको छ ।