रूपन्देहीको बुटवल उपमहानगरपालिकाको प्रमुखमा सत्तारूढ गठबन्धनबाट उम्मेदवार बनेका नेपाली कांग्रेसका खेलराज पाण्डे निर्वाचित भएका छन् । उपप्रमुखमा भने नेकपा एमालेकी सावित्रादेवी अर्याल निर्वाचित भइन् । 

एमालेका उम्मेदवार बाबुराम भट्टराईलाई ७ हजार ५३३ मतान्तरले पराजित गर्दै पाण्डे नगर प्रमुखमा निर्वाचित भएका हुन् । पाण्डेले ३० हजार १३० मत ल्याए भने उनका निकटतम प्रतिस्पर्धी भट्टराईले २२ हजार ५९७ मात्र ल्याउन सके । 

त्यस्तै उपप्रमुखमा गठबन्धनबाट उम्मेदवार बनेका नेकपा (एकीकृत समाजवादी) का चीनबहादुर गुरूङलाई ७ हजार ९९४ मतले पराजित गर्दै अर्याल निर्वाचित भएकी हुन् । अर्यालले २४ हजार ९०४ मत ल्याउँदा गुरूङले १६ हजार ९८० मत मात्र ल्याउन सके । १९ वटा वडा रहेको बुटवलमा ९० हजार १६ मतमध्ये ६३ हजार १७ मत खसेको थियो ।

२०७४ को निर्वाचनमा एमालेका शिवराज सुवेदीसँग २ हजार ३९८ मतले पराजित भएका पाण्डे पाँच वर्षपछि भारी मतान्तरले पश्चिम नेपालकै प्रमुख शहरको पहिचान बनाएको राजनीतिक तथा आर्थिक केन्द्र बुटवलको नेतृत्वमा पुगेका हुन् ।

नेकपा एमालेको गढका रूपमा परिचित बुटवलमा यसपालि खेलराजले गठबन्धनको बलमा कांग्रेसको झण्डा गाडेका छन् ।

बुटवलका ५ वटा वडाहरू १०, ११, १४, १८ र १९ वडामा एमाले विजयी भएको छ भने वडा नम्बर १ मा स्वतन्त्र, २ मा नेकपा एस, ३ मा रुख चिह्नबाट लडेर माओवादी केन्द्र निर्वाचित भएको छ । त्यस्तै ४, ५, ६, ७, ८, ९, १२, १३, १५, १६, १७ मा कांग्रेसले जित निकालेको छ । बुटवलमा एमाले एकातिर र सत्तारूढ गठबन्धन अर्कोतिर भएर चुनाव लडेका थिए । 

को हुन् निर्वाचित मेयर पाण्डे ?

स्याङ्जाको कालीगण्डकी गाउँपालिका तत्कालीन (आलमदेवी गाविस कोटाकोट) मा २०२६ सालमा लीलाबल्लभ पाण्डे र माता तारादेवी पाण्डेका सन्तानका रूपमा खेलराजको जन्म भएको थियो ।

पाण्डेय २०४६ सालयता बुटवलमा बसोवास गर्दै आएका छन् । स्नातक तहसम्मको अध्ययन पूरा गरेका पाण्डेयले नेपाल विद्यार्थी संघको जिम्मेवारीबाट राजनीतिक यात्रा शुरू गरेका हुन् । २०३९ सालमा आदर्श मावि कोटाकोटमा नेविसंघको सदस्यता लिएर राजनीति सुरू गरेका पाण्डे वि.स २०४४ सालमा अमृत साइन्स क्याम्पसको नेविसंघको सहसचिव थिए ।

२०४६ सालमा रुपन्देही आएपछि उनको विद्यार्थी राजनीतिको यात्रा झनै फराकिलो बन्यो । २०४७ सालमा बुटवल बहुमुखी क्याम्पस नेविसंघ उपसभापति, २०५२ सालमा नेविसंघ रुपन्देही सचिव, २०५९ सालमा तरुण दल रुपन्देही जिल्ला अध्यक्ष र २०६० सालमा तरुण दल केन्द्रीय सदस्य हुँदै २०६७ सालदेखि अहिलेसम्म तीन कार्यकाल नेपाली कांग्रेस बुटवल नगर सभापति रहेका छन् ।

२०७२ मा सरकारले बुटवल नगरविकास समिति सभापति बनाएपछि उनीसँग बुटवलको विकासमा राजनीतिक, आर्थिक र सामाजिक नाता जोडिन पुग्यो ।

बीपी कोइरालाका पुस्तकहरूको अध्ययनबाट प्रभावित भएपछि नेपाली कांग्रेसको राजनीतिमा लागेका पाण्डेयले कांग्रेसभित्र पनि लोभलालचरहीत, सामान्य, सरल र प्रस्ट वक्ताको रूपमा आफूलाई उभ्याएका छन् । उपमेयरमा निर्वाचित अर्याल नेकपा एमालेको केन्द्रीय सदस्य समेत हुन् । सामाजिक क्षेत्रमा क्रियाशील उनी लामो समयदेखि एमालेको राजनीतिमा सक्रिय छिन् ।