नेपाल आयल निगमले पेट्रोलियम पदार्थको मूल्यवृद्धि गरेको छ।  निगमले आइतबार मध्यरातदेखि लागू हुनेगरी पेट्रोलियम पदार्थको मूल्यवृद्धि गरेको हो । अन्तर्राष्ट्रिय बजारमा नै मूल्य वृद्धि भएपछि खरिद लागत बढेर घाटा बढेपछि भाउ बढाउनु परेको निगमको भनाइ छ । 

अहिले निगमलाई लिटर पेट्रोलमा रु २२.९४, डिजेलमा रु ३५.३३ घाटा रहेको छ । यस्तै ग्यासमा प्रति सिलिन्डर १०५० घाटा रहेको निगमले जारी गरेको विज्ञप्तिमा उल्लेख छ । समग्रमा १५ दिनमा करीब रू ४ अर्ब ४९ करोड घाटा हुने स्थिति रहेपछि मूल्यवृद्धि गर्नुपरेको निगमको भनाइ छ।   जसअनुसार राति बजेदेखि लागू हुने गरी पेट्रोल, डिजेल र मट्टितेलको साविकको खुद्रा विक्री मूल्यमा प्रतिलिटर रू १० ले वृद्धि गरी  खुद्रा बिक्री मूल्य क्रमशः १८०, १६३ र १६३ रुपैयाँ कायम गरिएको निगमले जारी गरेको विज्ञप्तिमा उल्लेख छ ।

यस्तै हवाई इन्धन (आन्तरिक) मा पनि प्रतिलिटर रू १० ले वृद्धि गरी नयाँ खुद्रा विक्री मूल्य रू १६६ प्रति लिटर कायम गरिएको छ । त्यसैगरी एलपी ग्यासमा प्रति सिलिन्डर रू २०० ले वृद्धि गरी नयाँ विक्री मूल्य रू १८०० प्रति सिलिन्डर कायम गरिएको निगमले जनाएको छ । 

 मूल्य समायोजन पश्चात पनि निगमलाई महिनामा एलपी ग्यासमा करिव रू ३ अर्ब घाटा हुने देखिएको छ भने डिजेलमा करिव रू ३ अर्व ४० करोड घाटा हुने देखिएको छ । यस्तै पेट्रोलमा करिव रू १ अर्व घाटा रहने देखिएको निगमको भनाइ छ ।