इरानको इस्लामिक रिभोल्युसनरी गार्ड कोर्प्स (आईआरजीसी)का वरिष्ठ अधिकृतलाई आइतवार तेहरानमा बन्दूकधारीहरूले घरबाहिर हत्या गरेका छन् । 

कर्नेल हुन सैयद खोदायारीलाई उनकै कारमा पाँचवटा गोली हानिएको थियो । चालकको सीटमा एकजना मानिस उत्तानो परेको र उनको नीलो शर्टको कोलरमा रगत लागेको देखिएको थियो । 

खोदायारीलाई डिफेन्डर अफ द स्यांक्चुअरी भनी इरानले वर्णन गरेको छ । सिरिया वा इराकवा इरानको पक्षमा काम गर्ने व्यक्तिलाई त्यो उपाधि दिइन्छ । 

खोदायारी कुद्स फोर्सका सदस्य थिए । आईआरजीसीको विदेशी कारवाही चलाउने उक्त इकाइका लागि सिरियामा रही खोदायारीले वर्षौंसम्म काम गरेका थिए । 

अमेरिका र इजरायल खोदायारीको हत्याका लागि जिम्मेवार रहेको इरानको आरोप छ । आक्रान्ताहरूलाई पहिचान गर्नका लागि अनुसन्धान थालेको आईआरजीसीले जनाएको छ । 

इरानको राष्ट्रिय सुरक्षा परिषद्ले यस हत्याबाट विभिन्न समीकरण परिवर्तन भएको र यसको प्रतिशोध लिइने बताएको छ । इरानको प्रतिशोधात्मक कारवाहीले पश्चिम एसियालाई थप अस्थिर बनाउने निश्चित छ ।

यसअघि सन् २०२० को नोभेम्बर महिनामा इरानका शीर्ष आणविक वैज्ञानिक मोहसेन फख्रिजादेको हत्या गरिएको थियो । 

अनि सन् २०२० को जनवरी महिनामा अमेरिकाले कुद्स फोर्सका कमान्डर कासिम सुलेमानीलाई इराकमा हत्या गरेको थियो । 

इरानले सिरिया सरकारलाई सहायता उपलब्ध गराउँदै आएको छ । कुद्स फोर्स अन्तर्गत उसले हजारौं लडाकू सिरिया र इराकमा आईएसविरुद्ध लड्न पठाएको छ ।