रूपन्देहीको बुटवल उपमहानगरपालिकाका नवनिर्वाचित प्रमुख खेलराज पाण्डेयले भूमिहीन सुकुम्बासी तथा अव्यवस्थित बसोबासीलाई जग्गाधनी पूर्जा दिने पहिलो निर्णय गरेका छन् । 

बुटवलको प्रमुख समस्याका रुपमा भूमिहीन सुकुम्बासी तथा अव्यवस्थित बसोबासीहरूलाई जतिसक्दो छिटो लालपूर्जा उपलब्ध गराउने उनले बताए । 

उपप्रमुख सावित्रादेवी अर्यालले बजार अनुगमनलाई प्रभावकारी बनाउने निर्णय गरेकी छन् । गत वैशाख ३० गते सम्पन्न स्थानीय तहको निर्वाचनबाट नगरप्रमुखमा पाण्डेय र उपप्रमुखमा अर्याल निर्वाचित भएका थिए । 

सोमवार नगर प्रमुख र उपप्रमुखसँगै वडाध्यक्ष तथा सदस्यहरूको शपथ  र पदभार गरिएको हो । 

यसअघि सोमवार बिहान नगरप्रमुख पाण्डेयलाई जिल्ला निर्वाचन कार्यालय, रुपन्देहीले भैरहवामा शपथ गराएको थियो । 

उपप्रमुख तथा अन्य जनप्रतिनिधिहरूलाई भने नगरप्रमुख पाण्डे आफैंले शपथ गराएका थिए ।

पदभार ग्रहणपछि बोल्दै नगरप्रमुख पाण्डेयले अन्य राजनीतिक दलहरूको सुझाव र सल्लाहलाई पनि लिएर जनताको मन जित्ने गरी बुटवलको विकासमा लाग्ने प्रतिबद्धता व्यक्त गरेका छन् । 

उनले निर्वाचनको समयमा मतदाताको घरदैलोमा जाँदा गरेका वाचा र योजनाहरू आफ्ना प्रमुख एजेण्डा रहेको उल्लेख गर्दै बुटवलको प्रमुख समस्याको रुपमा रहेको भूमिहिन सुकुम्बासीहरूको समस्यालाई समाधान गर्ने प्रतिबद्धता व्यक्त गरे ।