राष्ट्रपति विद्यादेवी भण्डारीले संघीय संसद्को दुवै सदनलाई संयुक्त सम्बोधन गर्दै अमेरिकाको मिलेनियम च्यालेन्ज कर्पोरेसन (एमसीसी)सँगको सम्झौता कार्यन्वयन शुरू भएको बताएकी छन् ।

संसद्लाई सम्बोधन गरेर सरकारको आगामी आर्थिक वर्ष २०७९/८० को नीति तथा कार्यक्रम सार्वजनिक गर्ने क्रममा एमसीसी संसद्बाट अनुमोदन भएर कार्यान्वयनको चरणमा रहेको बताएकी हुन् । 

संसद्ले गत फागुनमा एमसीसी अनुमोदन गरेको थियो । 

संघीय संसदको संयुक्त सदनलाई सम्बोधन गर्दै राष्ट्रपति भण्डारीले भनिन्, ‘अमेरिकाको मिलेनियम च्यालेन्ज कर्पोरेसनसँगको सम्झौता संसद्बाट अनुमोदन भई विद्युत प्रसारण लाइन र सडक सञ्जाल विस्तारको काम अगाडि बढेको छ ।’ 

त्यसैगरी राष्ट्रपति भण्डारीले नेपालको प्रधानमन्त्रीले भारतको औपचारिक भ्रमण गरेको, भारतीय प्रधानमन्त्री नरेन्द्र मोदीले लुम्बिनी भ्रमण गरेको र चीनको विदेश मन्त्रीको नेपाल भ्रमण भएकोबाट द्विपक्षीय सम्बन्ध सुदृढ भएको बताएकी छन् ।