चाबहिलको सेन्ट लरेन्स कलेजका संयोजक जनार्दन अधिकारीले विद्यार्थीलाई कलेजबाट निष्कासन गर्ने धम्की दिँदै यौन दुर्व्यवहार गर्ने गरेको खुलेको छ ।

कलेजको ११ कक्षामा पढ्ने विद्यार्थीलाई २ महिनादेखि आफ्नो ‘बेड पार्टनर बन’ भन्दै म्यासेज गर्ने र भन्ने गरेको खुलासा भएपछि मंगलवार विद्यार्थीले आन्दोलन गरेका थिए । ती विद्यार्थीलाई मात्रै नभएर अन्य विद्यार्थीलाई पनि अधिकारीले यौन दुर्व्यवहार गर्ने गरेको विद्यार्थीले बताएका छन् । 

आन्दोलन गर्न काठमाडौं प्रहरी वृत्त गौशाला आएका विद्यार्थीका अनुसार अन्य विद्यार्थीलाई छोटा कपडा लगाएर फेसबूकमा फोटो राख्न भन्ने गरेको आरोप लगाएका छन् । 

‘किन सर्ट लगाएर फोटो राख्छेस्, स्कर्ट लगाएर राख न ! झन् राम्रो देखिन्छ भन्दै ढाडमा सुम्सुम्याउँथे,’ एक जना विद्यार्थीले भनिन्, ‘मलाई पनि त्यो सरले एक महिनादेखि त्यस्तो गर्दै आएको थियो ।’

संयोजक अधिकारीले पत्नीसँग लामो समय रोमान्स गर्न नपाएकाले विद्यार्थीहरूलाई ‘सेक्स पार्टनर’ बन्न भन्ने गरेको कुरा बाहिर आएपछि आन्दोलन गरेको विद्यार्थीले बताएका छन् ।

‘त्यो सरले साथीलाई म रुम खोजेर राखिदिन्छु तिमी बस्छौ भनेर सोधेछ,’ अर्की विद्यार्थीले सुनाइन्, ‘त्यसपछि उसले आफ्ना बाआमालाई भनेपछि हामीले आज आन्दोलन गरेका हौं ।’

अधिकारीले ती विद्यार्थीलाई आफूले भनेको कुरा बाहिर कसैलाई भनेमा परीक्षा दिन नमिल्ने बनाइदिने र कलेजबाट निष्कासन गरिदिनेसम्मको धम्की दिएको विद्यार्थीको दाबी छ ।

ती विद्यार्थीका अभिभावकले गौशाला वृत्तमा किटानी जाहेरी दिएका छन् । प्रहरी परिसर काठमाडौंका प्रवक्ता प्रहरी उपरीक्षक (एसपी) दिनेश मैनालीका अनुसार अहिले अधिकारीलाई नियन्त्रणमा लिएर अनुसन्धान शुरू गरिएको छ ।

‘हामीले उहाँलाई नियन्त्रणमा लिएका छौं । अनुसन्धान भइरहेको छ,’ मैनालीले लोकान्तरसँग भने ।