अभिनेता सौगात मल्ल र सलोन बस्नेतको मुख्य भूमिका रहेको चलचित्र ‘घनचक्कर’को ट्रेलर सार्वजनिक गरिएको छ । 

जितेन्द्र राजोपाध्याय निर्देशित चलचित्र असार १० गतेदेखि देशव्यापी प्रदर्शनमा आउँदैछ । सार्वजनिक ट्रेलरमा युवाहरुको सपनालाई कसरी घनचक्करमा पारेर गलत काममा लगाइन्छ भन्ने विषय प्रस्तुत गरिएको छ । ट्रेलरबाट कमेडी शैलीमा चलचित्र निर्माण भएको बुझ्न सकिन्छ । 

चलचित्रमा सौगात र सलोनका साथमा जेबी डीसी, शिशिर भण्डारी, आशान्त शर्मा, कृष्णभक्त महर्जन, सरोज खनाल लगायतका कलाकारहरुको अभिनय छ ।

अर्जुन सिंहको कथा, कागी लिम्बुको पटकथा तथा संवाद रहेको चलचित्रका निर्माता करुणा अर्याल र संगम भट्ट हुन् । 

सुसन प्रजापतिको छायाँकन रहेको चलचित्रलाई मित्र डी गुरुङले सम्पादन गरेका हुन् ।