सर्वोच्च अदालतले सशस्त्र प्रहरीका पूर्व नायब महानिरीक्षक रञ्जन कोइरालाको सजाय घटाउने सर्वोच्चकै यसअघिको फैसला उल्ट्याइदिएको छ ।

सर्वोच्च अदालतका प्रवक्ता विमल पौडेलका अनुसार कामु प्रधानन्यायाधीश दीपककुमार कार्की तथा न्यायाधीशहरू टंकबहादुर मोक्तान र कुमार चुडालको पूर्ण इजलासबाट आज उक्त फैसला भएको हो ।

यसअघि सर्वोच्च अदालतकै तत्कालीन प्रधानन्यायाधीश (हाल निलम्बित) चोलेन्द्र शमशेर राणा र न्यायाधीश तेजबहादुर केसीको इजलासले तत्कालीन पुनरावेदन अदालतले तोकेको सर्वस्वसहितको जन्मकैदको सजाय घटाएर ८ वर्ष ६ महिना कामय गरिदिएको थियो ।

त्यसअघि काठमाडौं जिल्ला अदालतले कोइरालालाई सर्वस्वसहित जन्मकैदको सजाय तोकेको थियो । जिल्ला अदालतको फैसला तत्कालीन पुनरावेदन अदालत पाटनले २०७२ मंसिर २३ गते सदर गरेको थियो ।

उक्त फैसलाविरुद्ध परेको पुनरावेदनमाथि सुनुवाइ गर्दै सर्वोच्च अदालतले गत असार १५ गते कोइरालालाई तोकिएको सजाय भारी छूट गर्दै ८ वर्ष ६ महिनामा झारिदिएको थियो ।

सर्वोच्चको उक्त फैसलापछि कोइराला रिहा भएका थिए । रिहा भएका कोइराला अब फेरि जेल जाने भएका छन्।

आफ्नै श्रीमती गीता ढकालको हत्या गरी शव जलाएको प्रकरणमा कोइराला दोषी ठहर भएका हुन् ।