रुपन्देहीको तिलोत्तमा भलबारीस्थित नेपाल आयल निगमको डिपोमा लागेको आगो नियन्त्रणमा आएको छ ।

शुक्रवार बिहान इन्धन अनलोड गर्ने क्रममा लु २ ख २६५६ र लु २ ख ५६८५ नम्बरको टयांकरमा आगलागी भएको थियो ।

आगलागीबाट लु २ ख २६५६ नम्बरको ट्यांकर पूर्ण रुपमा क्षति र लु २ ख ५६८५ नम्बरको ट्यांकरमा आंशिक रुपमा क्षति पुगेको जिल्ला प्रहरी कार्यालय रुपन्देहीका प्रहरी प्रवक्ता नवरत्न पौडेलले जानकारी दिए । आगलागीबाट ट्यांकरका हेल्पर तिलोत्तमा नगरपालिका-९ का १८ वर्षीय विजेश चौधरी घाइते भएको उनले बताए । उनको हात र खुट्टा जलेको छ ।

घाइते चौधरीको मणिग्रामस्थित क्रिमशन अस्पतालमा उपचार भइरहेको छ । आगो तीन वटा दमकलले नियन्त्रणमा लिएको प्रहरीले जनाएको छ ।