प्रतिनिधि सभाबाट सरकारका नीति तथा कार्यक्रम शनिवार पारित हुने भएको छ । आइतवार बजेट आउने भएपछि शनिवार नै सरकारका नीति कार्यक्रम पारित गर्न लागिएको हो । शनिवार बिहान ११ बजेपछि बस्ने पहिलो बैठकमा छलफल सम्पन्न गर्ने र आजै दोस्रो बैठकमा प्रधानमन्त्रीले जवाफ दिने कार्यसूची रहेको संसद सचिवालय स्रोतले बतायो । 

दोस्रो बैठकबाट नीति तथा कार्यक्रम पारित हुने सभामुख अग्नि सापकोटाका प्रेस विज्ञ श्रीधर न्यौपानेले लोकान्तरलाई जानकारी दिए । अपरान्ह बस्ने दोस्रो बैठकमा प्रधानमन्त्री शेरबहादुर देउवाले जवाफ दिनेछन् । प्रमुख प्रतिपक्षी दलका नेता एमाले अध्यक्ष केपी शर्मा ओलीले प्रधानमन्त्रीबाट केही विषयमा चित्तबुझ्दो जवाफ चाहिने बिहीवार बताएका थिए । 

राष्ट्रपति विद्यादेवी भण्डारीले जेठ १० गते संसदमा पेश गरेको नीति तथा कार्यक्रम राष्ट्रिय सभाबाट शुक्रवार नै पारित भइसकेको छ । प्रतिनिधि सभाबाट नीति तथा कार्यक्रम पारित गर्ने बैठकमा अनिवार्य उपस्थितिका लागि सत्तारुढ दलले आफ्ना सांसदलाई ह्वीप लगाएका छन् । 

आजै अर्थमन्त्री जनार्दन शर्माले आर्थिक वर्ष २०७८/०७९ को आर्थिक सर्वेक्षण पेश गर्ने कार्यक्रम छ ।