सांसद तथा नेपाली कांग्रेसका महामन्त्री गगन थापाले संसदमा एमाले अध्यक्ष केपी ओलीले गरेको सम्बोधन रन्थनिएको बेलाको कुण्ठा भएको टिप्पणी गरेका छन् । 

शनिवार संसद बैठकमा सरकारको नीति तथा कार्यक्रममाथिको छलफलमा भाग लिँदै थापाले ओलीले गरेको सम्बोधनमाथि यस्तो टिप्पणी गरेका हुन् । 

एमाले अध्यक्ष ओलीले गत बिहीवार सरकारको नीति तथा कार्यक्रममाथि आफ्नो विचार राख्दै संसदमा तीन घण्टा लामो सम्बोधन गरेका थिए ।

ओलीको त्यही सम्बोधनमाथि थापाले टिप्पणी गरेका हुन् । स्थानीय तहको  निर्वाचनमा एमालेले पराजय बेहोरेपछि अध्यक्ष ओली रन्थनिएको र त्यसको कुण्ठा संसदमा अभिव्यक्त भएको थापाको आशय थियो ।  

थापाले आफ्नो सम्बोधनको शुरूमै ओलीको सम्बोधनमाथि टिप्पणी गरेका थिए ।

थापाले भने, ‘नीति तथा कार्यक्रममाथिको छलफलमा शरूमै घन्टौं लामो गन्थन प्रस्तुत भएपछि साथीहरूले भन्नुभएको यसमा उठेका सबै प्रश्नको जवाफ दिनुपर्छ । तर, मैले साथीहरूलाई भनेँ प्रश्नको उत्तर हुन्छ, विचारमा टिप्पणी हुन्छ । सहमति असहमति व्यक्त हुन सक्छ । तर, कुण्ठामा त्यस्तो केही पनि हुँदैन । कुण्ठामा केबल सहानुभूति मात्रै हुन्छ । त्यसैले यो बेलामा रन्थनिएको बेलामा उठेर, बसेर, सुतेर जसरी बोल्न दिए पनि हुन्छ । पलेँटी कसेर बोले पनि हुन्छ । एक खुट्टामा टेकेर बोले पनि हुन्छ । अहिले हामीले सुनिदिनुपर्छ । कहाँ बोल्ने कहिले बोल्ने भन्ने बोल्नेले हेक्का राख्ने कुरा हो । हामीले केबल विचरा भन्न सक्छौँ । यति मात्रै हो ।’ 

शनिवारको संसद बैठकमा विभिन्न राजनीतिक दलका शीर्ष नेताहरूले सरकारले ल्याएको आगामी आर्थिक वर्षको नीति तथा कार्यक्रमाथि आ-आफ्नो विचार राखिरहेका छन् ।