नेकपा एमालेका उपाध्यक्ष तथा पूर्वअर्थमन्त्री विष्णु पौडेलले वर्तमान सरकारलाई दीर्घकालीन महत्त्वका आयोजनाहरू अघि सार्ने अनुमति नभएको बताएका छन् । 

नीति तथा कार्यक्रममाथिको छलफलमा शनिवार भाग लिँदै उनले यो चुनावी सरकार भएकाले 'पपुलिस्ट' प्रकृतिका कार्यक्रम ल्याउन नपाउने बताएका हुन् । 

‘यो चुनावी सरकार हो, मंसिरभित्र चुनाव सम्पन्न गर्नुपर्नेछ,’ उनले भने, ‘आगामी बजेट स्रोतको सीमाभित्र नरहेर बाहिर जाने जोखिम निम्तिएको छ, यसले आगामी सरकारलाई दायित्व थप्ने र बोझ थप्नेछ ।’

उनले नीति तथा कार्यक्रममा निकै हावादारी कुरा गरिएको पनि बताए । हरेक प्रदेशमा २ वटा मेडिकल कलेजको योजना, बुढीगण्डकी जलविद्युत आयोजना स्वदेशी लगानीबाट बनाउने निर्णय हावादारी भएको समेत उनको भनाइ छ । 

साथै उनले कालीगण्डकी तिनाउ डाइभर्सन र गौतमबुद्ध अन्तर्राष्ट्रिय विमानस्थल सरकार पछि हट्ने गल्ती गर्न नहुने बताए ।