नेकपा माओवादी केन्द्रका अध्यक्ष पुष्पकमल दाहाल प्रचण्डले पार्टीभित्र लज्जास्पद अन्तर्घातको कुरा गरेर बाहिर सरकारमाथि धारे हात लगाउने काम नगर्न एमाले अध्यक्ष केपी ओलीलाई सुझाव दिएका छन् । मत परिणाम आफ्नो पक्षमा अनुकुल नदेखेपछि चुनावमा धाँधली भयो भन्नु गतल भएको उनको टिप्पणी थियो । 

सरकारका नीति तथा कार्यक्रममाथि शनिवार प्रतिनिधि सभामा धारणा राख्ने क्रममा प्रचण्डले चुनावमा अपेक्षाकृत नतिजा नआएपछि एमाले अध्यक्ष ओलीले गलत व्याख्या गरेको बताएका हुन् । 

‘प्रतिपक्षी दलको नेताले चुनावमा सत्तापक्षको तर्फबाट आतंक मच्चाइयो भनेर व्याख्या गर्नुभयो । मैले नबुझेको कुरा, उहाँले पार्टीभित्र र सार्वजनिक रुपमा एउटा मूल्याकन गरेको कुरा गर्नुभयो–आफ्नो स्थिती कमजोर किन भयो भन्दा लज्जास्पद अन्तर्घात । अन्तर्घात मुख्य कारण हो कि सरकारले लिएको नीति मुख्य हो ? त्यो प्रष्ट भएको देखिएन’ प्रचण्डले भने ।

प्रचण्डले एकै चरणमा भएको चुनाव शान्तिपूर्ण र मूलभूत रुपमा सफल भएको बताए । ‘कमीकमजोरीको सरकारले पनि आत्मसमीक्षा गर्नुपर्छ, चुनाव मूलभूत रुपमा सफल भएको छ । मत परिणाम निक्लिँदै जादा सरकारमाथि धारे हात लगाउने तरिका विल्कुल बेठीक छ’ प्रचण्डले भने ।