नेकपा माओवादी केन्द्रका अध्यक्ष पुष्पकमल दाहाल प्रचण्डले मूल्यवृद्धि नियन्त्रणको पहल गर्न सरकारलाई आग्रह गरेका छन् । 

शनिवार प्रतिनिधि सभाको बैठकमा बोल्दै प्रचण्डले कर घटाएर भए पनि मूल्यवृद्धि नियन्त्रण गर्नुपर्ने तर्क गरेका हुन् । मूल्यवृद्धि रोक्न नसके भान्साबाटै विद्रोहको अवस्था आउन सक्नेबारे सरकारलाई सचेत गराएका छन् । 

संसद बैठकमा प्रचण्डले भने, ‘महँगीको मारले नेपाली जनताको ढाड सेकिएकै छ । भान्साबाट विद्रोह शुरू हुन्छ कि भन्ने परिस्थिति बनेकै छ । पेट्रोलियम पदार्थमा छिमेकी देशहरूले कर छुट दिएर मूल्य समायोजन गर्ने प्रयास गरेका छन् । हाम्रोमा पनि त्यसै गरी जनतालाई राहत दिने कुरामा सरकारको ध्यान जाओस् ।’

मूल्यवृद्धि नियन्त्रण गर्नेबारे आफूले प्रधानमन्त्री शेरबहादुर देउवालाई पनि जानकारी गराएको उनले बताए । 

‘मैले प्रधानमन्त्रीलाई भेटेर भनेको छु कर घटाएर भए पनि मूल्यवृद्धि रोक्नुपर्‍यो । अन्यथा जनतामा आक्रोश बढ्न सक्छ,’ प्रचण्डले भने ।