प्रधानमन्त्री शेरबहादुर देउवाले चीनको पूर्वाधार परियोजना बेल्ट एण्ड रोड (बीआरआई)को विरोधी नभएको त्यसका बारेका विस्तृत छलफल गरेर निर्णयमा पुग्नुपर्ने बताएका छन् । 

संसदमा सांसदहरुले उठाएको प्रश्नको जवाफ दिने क्रममा प्रधानमन्त्री देउवाले भने, ‘बीआरआई ऋण सहयोग हो । म बीआरआई विरोधी होइन, देशको आर्थिक अवस्थाले धान्ने हो कि होइन भन्ने हेर्नुपर्छ ।’

त्यसैगरी, नेपालको उर्जा उत्पादन र वितरणबारे संयुक्त अवधारणा आफ्नो भारत भ्रमणको क्रममा संयुक्त वक्तव्यमा आएको प्रधानमन्त्री देउवाले जानकारी दिए । 

संसदमा एमालेका सांसदहरुले उर्जा उत्पादन र वितरण बारे नीति तथा कार्यक्रममा उल्लेख भएको भारतसँगको संयुक्त अवधारणा बारे प्रश्न राखेका थिए । 

‘उर्जा सम्बन्धी अवधारणा भारत भ्रमणको क्रममा आएको वक्तव्य हो । यो सम्झौता होइन’, प्रधानमन्त्री देउवाले भने ।