तारा एयरको विमान हराइरहेको भनिएको मुस्ताङको कोवाङ क्षेत्रमा बाक्लो हुस्सु लागेपछि खोजी कार्यमा समस्या भएको छ ।

बाक्लो हुस्सु लागेको हुँदा उक्त क्षेत्रमा विमान खोज्नका लागि हेलिकप्टर समेत जान सकेका छैन । 

मुस्ताङको थासाङ गाउँपालिकामा पर्ने कोवाङको धेरैजसो भाग हिमाली क्षेत्रमा पर्छ । थासाङ गाउँपालिकाका उपाध्यक्ष सोमल हिराचनले कोवाङको माथिल्लो भेगमा जहाज दुर्घटनामा परेको अनुमान गरेको तर हिडेर कोवाङको माथिल्लो भेगमा पुग्न असाध्यै कठिन भएको बताए । 

‘कोवाङको माथिल्लो भेगमा जहाज हराइरहेको आशंका गरेर हेलिकप्टरहरूले खोजी गरिरहेका छन् । तर, त्यस क्षेत्रमा बाक्लो बादल लागेको हुँदा हेलिकप्टर पनि पुग्न सकिरहेका छैनन्’, उपाध्यक्ष हिराचनले बताए । 

शुरूमा मुस्ताङको टीटी ताल क्षेत्रमा जहाज हराइरहेको अनुमान गरिएको भए पनि टीटी ताल वरपर भने दुर्घटना नभएको लामाले बताए । 

‘म अहिले टीटी ताल नजिकै छु । यहाँबाट त्यस क्षेत्रमा पुग्न मलाई मोटरसाइकलमा पाँच मिनेट मात्रै लाग्छ । टीटी क्षेत्रमा जहाज दुर्घटना भएको छैन्’, लामाले भने, ‘कोवाङको माथिल्लो भेग धौलागिरी आइसफल तिर नै जहाज दुर्घटनामा हुनसक्ने हामीलाई लागेको छ । तर, त्यसतर्फ हेलिकप्टर पनि जान सकेको छैन ।’

थासाङ गाउँपालिका अन्तर्गतको कालिगण्डकी किनारमा भने हेलिकप्टर दुर्घटना नभएको स्थानीय हिराचनले जानकारी दिए । 

‘तल्लो क्षेत्रमा विमान दुर्घटना भएको भए हामीले थाहा पाइसक्थ्यौँ । माथिल्लो हिमाली क्षेत्रमा दुर्घटना भएको हुनसक्छ । त्यहाँ सम्पर्कको माध्यम हामीसँग पनि छैन’, उनले भने ।