नेपाल पर्वतारोहण संघ (एनएमए)को आगामी निर्वाचनमा उम्मेदवार सिफारिश गर्न नेकपा एमाले सम्बद्ध व्यवसायीले एक कमिटी गठन गरेका छन् । 

पर्यटन व्यवसायी पूर्ण कुँवरको संयोजकत्वमा यमबहादुर खड्का र जीवन थापा मगर सदस्य रहेको उक्त कमिटी शुक्रवार गठन भएको हो । यो समितिमा दुई सदस्य थप गर्न सकिने पनि उल्लेख छ ।

समितिले एनएमएको आगामी निर्वाचनमा नेकपा एमालेसम्बद्ध व्यवसायीले नेतृत्व दाबी गर्ने भएको छ । यसका लागि पर्यटन सम्बद्ध अन्य राजनीतिक दलहरूसँग आवश्यक छलफल र समन्वय गर्नेछ । निर्वाचनमा नेकपा एमालेसँग आबद्ध भएका पर्यटन व्यवसायीसँग समन्वय गरेर उम्मेदवार छनोट, वार्ता समिति तथा विशेष छलफल गर्ने म्याण्डेड पाएको पनि समिति सदस्य तथा पर्यटन व्यवसायी यमबहादुर खड्काले बताए । 

नेकपा एमाले पर्यटन इलाका विशेष कमिटी र नेपाल राष्ट्रिय पर्यटन व्यवसायी संगठनको संयुक्त आयोजनामा शुक्रवार बसेको बैठकले उक्त कमिटी गठन गरेको हो । यो कमिटीले आफ्नो एमाले सम्बद्ध व्यवसायीको तर्फबाट उम्मेदवार छनोटका लागि उपयुक्त पर्यटन व्यवसायीलाई सिफारिश गर्ने भएको छ ।