जनता समाजवादी पार्टी (जसपा) नेपालका अध्यक्ष उपेन्द्र यादव उपस्थित भएकै कार्यक्रममा जसपाकै कार्यकर्ताबीच कुटाकुट भएको छ ।

मंगलवार जनकपुरमा आयोजित समीक्षा कार्यक्रममा प्रमुख अतिथि भएर गएका यादवकै सामुन्ने कार्यक्रममा जसपाका कार्यकर्ताबीच कुटाकुट भएको हो ।

जसपा धनुषाका अध्यक्ष पशुपति यादवका अनुसार धनुषाकै सबैला नगर अध्यक्ष वैद्यनाथ रायले आफ्नो मन्तव्य राखेर कुर्सीमा बसेकै बेला केही कार्यकर्ताले उनलाई मुक्काले कुटपिट गरेका हुन् ।

अचानक मुक्काले हान्न थालेपछि त्यहाँ रहेका स्थानीयले मुक्का हान्ने र मुक्का खानेलाई अलग गरेको यादवले बताए ।

नगर अध्यक्ष रायले पार्टीकै केन्द्रीय सदस्य साधु यादवले अन्तर्घात गरेको भनेर आफ्नो मन्तव्यमा धारणा राखेका थिए । परिणाम स्वरूप उनी आफ्नो भनाई राखेर मन्चबाट ओर्लिएर आफ्नो कुर्सीमा बसेकै बेला साधु यादव समर्थित केही कार्यकर्ताले उनलाई मुक्का हानेको त्यहाँ उपस्थित एक नेताले बताए । 

कुटपिटमा क्रममा सिकिन्दर सिंह यादव, जितेन्द्र मुखिया, अवध किशोर रविदास लगायतका कार्यकर्तालाई सामान्य चोट लागेको थियो ।