कञ्चनपुरको शुक्लाफाँटा नगरपाालिका–१ गणेशपुरका शेरसिंह राना निकै खुशी देखिन्छन् । घर जोड्ने सडक निर्माण भएपछि उनी खुशी भएका हुन् ।

बसोबास भएको ५५ वर्षपछि राना परिवार सडक सञ्जालमा जोडिएका हुन् ।

‘घर वरिपरि खेत थियो, त्यसमै पुख्र्यौली घर थियो,’ उनले भने, ‘घर आउजाउ गर्नका लागि सडक त परको कुरा हिँडडुल गर्ने बाटो नै थिएन । खेतको आली भएर हिँडडुल गर्नु पर्दथ्यो ।’ खेतको आली भएर घरपालुवा जनावर र परिवारका सदस्यले हिँड्ने गरेको उनले बताए ।

‘अर्काको खेत भएर जनावरलाई डोहोर्‍याएर लैजाँदै गर्दा कहिले खेतमा नोक्सानी गरिहाल्थे,’ उनले भने, ‘छिमेकीको गाली मात्रै होइन । कहिलेकाहीँ खप्की समेत खानु पर्दथ्यो । अब ती कुरा विगत भइसके । हिँड्ने खेतका आली सडकमा परिणत भएका छन् । सहजरूपमा हिँडडुल गर्न पाइएको छ ।’

खेतसम्मै ट्रयाक्टर गुडाएर जोत्न सकिने भएको उनले बताए । रानासँग ३ बिघा बढी जग्गा रहेको छ । सडक निर्माण नहुँदा जग्गाको मूल्य थोरै थियो । सडक निर्माणले जग्गाको मूल्य समेत दोब्बरले बढेको उनी बताउँछन् । शेर सिंहसँगै १२ परिवार किसान सडकमा जोडिएका छन् ।

किसान बाबुराम रानाले सडक निर्माणपछि निर्धक्कसँग खेतीपाती गर्न र हिँडडुल गर्न पाइएको बताए । ‘विगतका जनप्रतिनिधिसँग सडक खोलिदिनका लागि हारगुहार गरे पनि ५ वर्षसम्म सुनुवाइ हुन सकेन,’ उनले भने, ‘नवनिर्वाचित वडाध्यक्षले निर्वाचित भएर आएपछि वडाको पहिलो काम सडकबाट वञ्चितका लागि सडक खोलेर गुन लगाएका छन् ।’

विक्रम संवत् २०२४ सालदेखि बस्दै आएका वासिन्दा सडकको अभाव झैल्दै आएका थिए । वडाकै पुरानो बस्ती अब सडक सञ्जालमा जोडिएपछि स्थानीय वासिन्दा निकै खुशी छन् । जनताको पीरमर्का बुझ्ने जनप्रतिनिधि पाउँदा सहज भएको स्थानीय वासिन्दा बताउन पछि पर्दैनन् ।

नवनिर्वाचित वडाध्यक्ष उत्तरदेव भट्ट सडकको अभाव झेल्दै आएका वासिन्दालाई स्थानीय वासिन्दाकै सहकार्य र सहमतिमा सुविधा पुर्‍याउन सडक खोलेको बताउँछन् ।

‘सडक एकातर्फ मात्रै सडक सञ्जालमा जोडिएको छ,’ उनले भने, ‘अर्कोतर्फ सडक सञ्जालमा जोड्नका लागि स्थानीय वासिन्दासँग छलफल शुरू गरेका छौं, छिट्टै निष्कर्षमा पुग्छौं ।’

हाल १ दशमलव ५ किलोमिटर सडक वडाको पहलमा निर्माण गरिएको उनले बताए । भर्खरै खोलिएको सडकको स्तरोन्नति गरी छिट्टै ग्राभेल राख्ने कार्य समेत गरिने उनको भनाइ छ ।