निर्माण सम्पन्न भएर कोरोनाका कारण रोकिएको ‘हिजोआजका कुरा’ असोजमा प्रदर्शनमा आउने भएको छ ।

निर्माण टीमले चलचित्रलाई असोजमा प्रदर्शन गर्ने निर्णय गरेको हो । 

चलचित्रले कोरोना महामारीअघि निर्माण सकिएर २०७७ वैशाख १२ गतेका लागि प्रदर्शन मिति तोकेको थियो तर कोरोना महामारीका कारण निर्धारित समयमा चलचित्र प्रदर्शन हुन पाएन ।

अब चलचित्र असोज २८ गतेदेखि प्रदर्शन हुने भएको निर्माता तथा कलाकार सन्तोष पन्तले लोकान्तरलाई जानकारी दिए । 

‘वितरकले हामीलाई साउनमा प्रदर्शन गर्न डेट दिएका थिए तर हामीले साउनमा नचलाउने भन्यौं,’ पन्तले भने, ‘हामीले छान्दा असोज २८ गतेका लागि छान्यौं । दशैंपछि तिहारअघिको समयमा चलचित्र प्रदर्शनमा आउने भएको हो ।’

पन्त फिल्म प्रोडक्सनको प्रस्तुति रहेको चलचित्र ‘हिजोआजका कुरा’ सन्तोषका छोरा साकार पन्तको निर्देशनमा बनेको हो । 

नेपाल टेलिभिजनमा प्रसारण भएको हास्य सिरियल ‘हिजोआजका कुरा’ नाम सापटी लिएर चलचित्र निर्माण गरिएको हो । सिरियल टेलिभिजन इतिहासको सर्वाधिक लोकप्रिय सिरियल मानिन्छ ।

पारिवारिक कथावस्तुमा निर्माण गरिएको चलचित्रमा सिरियलकै मुख्य जोडी सन्तोष पन्त र रमा थपलिया मुख्य भूमिकामा छन् । चलचित्रमा केकी अधिकारी, ऋचा शर्मा, रीमा विश्वकर्मा, दिव्यदेव पन्त, साकार पन्त, जयनन्द लामा, रमेश अधिकारी, जेबिका कार्की लगायतको समेत मुख्य भूमिका छ । चलचित्रमा समावेश ‘माया जदौ’ बोलको गीत सुपरहिट समेत भइसकेको छ । 

असोजका लागि यसअघि ‘परदेशी २’, ‘प्रेम गीत ३’ले प्रदर्शन मिति घोषणा गरिसकेको छ । ‘हनीबनी’ले असोजका लागि प्रदर्शन मिति घोषणा गरेको छ भने दीपकराज गिरी–दीपाश्री निरौलाको नयाँ चलचित्र पनि असोजमा प्रदर्शन हुने जनाइएको छ ।