थुप्रै नेपाली चलचित्रमा डरलाग्दा भिलेन बनेका ‘टार्जन’ उपनामबाट चिनिने अभिनेता राजीव मानन्धरले टेलिसिरियल ‘अति भो’मा अभिनय गरेका छन् । 

आइतवार प्रसारण भएको भाग १०२ मा राजीवको अभिनय हेर्न सकिन्छ । सिरियलका निर्देशक सुरज खनालका अनुसार आउँदो भागमा पनि राजीवको अभिनय हेर्न सकिन्छ ।

सिरियलमा अभिनेता राजीवलाई सुहाउने चरित्रमा प्रस्तुत गरिएको खनालले बताए । राजीव हिजोआज नेपालीभन्दा भोजपुरी चलचित्रमा बढी व्यस्त छन् ।

नेपाल टेलिभिजनमा हरेक आइतवार राति प्रसारण हुँदै आएको सिरियलमा रियाशा दाहाल मुख्य भूमिकामा प्रस्तुत हुँदै आएकी छन् । 

सिरियलमा सुरज खनाल, शर्मिला शर्मा, बिमला गिरी, लक्ष्मण बस्नेत, रिता सिवाकोटी, शिवराज तिमल्सेना, सुबु शाही, धनराम मुस्कान, रोशनी कार्की लगायतको अभिनय रहँदै आएको छ ।