अभिनेता धीरज मगर र अभिनेत्री अदिती बुढाथोकी अभिनित चलचित्र ‘बाबरी’को शीर्ष गीत सार्वजनिक गरिएको छ ।

मंगलवार काठमाडौंमा एक कार्यक्रमकाबीच सुरेन्द्र पौडेल निर्देशित चलचित्रको ‘बाबरी रंग’बोलको गीत सार्वजनिक गरिएको हो ।

गीतसँगै चलचित्रको पोष्टरसमेत सार्वजनिक गरिएको छ ।

सार्वजनिक गीतमा अभिनेता धीरज र अभिनेत्री अदिती रोमान्टिक मुद्रामा प्रस्तुत छन् ।

यो गीतमा अस्मिता अधिकारी र अनमोल गुरुङले स्वर दिएका छन् । अनमोल गुरुङको शब्द एवं संगीत रहेको गीतलाई सञ्जीव बराइलीले एरेन्ज गरेका हुन् ।

त्रिकोणात्मक प्रेमकथामा आधारित चलचित्र ‘बाबरी’ भदौ ३१ गतेबाट देशव्यापी रुपमा प्रदर्शन हुँदैछ ।

चलचित्रमा धीरज नाड्कर पनि मुख्य भूमिकामा छन् । पुष्पलता बुढाथोकी र गणेश बुढाथोकी निर्माता रहेको चलचित्रलाई नरेन्द्र मैनालीले खिचेका हुन् ।

प्रदर्शनको हिसावले ‘बाबरी’ धीरज र अदिती दुबैको दोस्रो चलचित्र हुनेछ । यसअघि धीरज अभिनित ‘इन्टु मिन्टु लण्डनमा’ प्रदर्शनमा आएको छ भने अदिती अभिनित ‘कृ’ प्रदर्शनमा आईसकेको छ ।