लेखक तथा अभिनेता खगेन्द्र लामिछानेको निर्देशनमा बनेको पहिलो चलचित्र ‘पानीफोटो’को टिजर सार्वजनिक गरिएको छ ।

बिहीवार हाइलाइटस् नेपालको यूट्युब च्यानलमार्फत सार्वजनिक टिजरमा हराएको छोरा खोज्न हिँडेका बुवाआमाको कथा देखाइएको छ ।  

सशस्त्र द्वन्द्वमा बेपत्ता छोराको पर्खाइमा बसेका बाआमाको कथा पेश गर्ने ‘पानीफोटो’ साउन १३ गतेदेखि देशव्यापी प्रदर्शनमा आउँदैछ । करीब डेढ दशकअघि गुरुकूल थिएटरमा ‘पानीफोटो’ नाटक मञ्चन भएको थियो । आफूले नै लेखेको त्यही चर्चित नाटकलाई खगेन्द्रले चलचित्रको स्वरूपमा ढालेका हुन् ।

सार्वजनिक टिजरमा अनुप बराल, मेनुका प्रधान, मलिका महत, खगेन्द्र लामिछाने अटाएका छन् । टिजर मर्मस्पर्शी लाग्छ । विशेषगरी अनुप र मेनुकाको जीवन्त अभिनय र गेटअप टिजरमा देखिन्छ ।

चलचित्रमा प्रकाश घिमिरे, माओत्से गुरुङ, बुद्धि तामाङ, रमेश अधिकारी, कमलमणि नेपाल, अनुज पाण्डे, राधा श्रेष्ठ, श्यामकुमार खड्का लगायतका कलाकारको समेत अभिनय छ । 

‘पशुपति प्रसाद’ र ‘धनपती’ जस्ता नेपाली मौलिक स्वादका चलचित्रको निर्माण गरेको टुकी आर्टस् प्रालिले मञ्जुश्री फिल्मस् प्रोडक्सनसँगको सहकार्यमा ‘पानीफोटो’ निर्माण गरेको हो । चलचित्रको निर्माता रोजिना सिटौला र रविन्द्र बज्राचार्य हुन् । दीपक बज्राचार्यको छायांकन रहेको चलचित्रलाई निमेष श्रेष्ठले सम्पादन गरेका छन् ।