नेकपा(एमाले)का उपमहासचिव एवं सांसद प्रदीप ज्ञवालीले अमेरिकाले प्रस्ताव गरेको स्टेट पार्टनरसिप प्रोग्राम (एसपीपी) सम्झौताको ड्राफ्ट बाहिरिएको सम्बन्धमा खोजी हुनुपर्ने बताएका छन् । 

आइतवार प्रतिनिधि सभाअन्तर्गतको अन्तर्राष्ट्रिय सम्बन्ध समितिको बैठकमा बोल्दै सांसद ज्ञवालीले एसपीपी सम्झौताको ड्राफ्टलाई बेवारिसे भनेर टार्न खोजिएको बताएका हुन् । 

उनले सो सम्झौताको विषय गम्भीर भएको भन्दै राज्यका निकायहरूमा कसरी र कहाँ–कहाँबाट पुग्यो यसको उद्गमको खोजी गर्नुपर्ने बताए । उनले सो सम्झौताको विषयलाई सन् २०१५ देखि २०१९ सम्मको पत्राचारको चरण, सन् २०१९ मा सरकारले अध्ययन गरेको चरण र हाल ड्राफ्ट बाहिरिनुसम्मको चरण गरी तीन चरणकै खोजी गरिनुपर्ने धारणा राखे । 

उनले कसैको व्यक्तिगत रिसले प्रधानन्यायाधीश चोलेन्द्रशमशेर जबरालाई महाभियोग लगाएर न्यायालयलाई विवादमा तानिएको पनि बताए । त्यसै गरी नेपाली सेनालाई पनि विवादमा ल्याउन खोजिएको उनको भनाइ छ । 

सांसद ज्ञवालीले राज्यका विभिन्न निकायहरूले अन्तर्राष्ट्रियस्तरमा पत्राचार गर्नुपर्दा सम्बन्धित मन्त्रालयहरूको समेत अनिवार्य रुपमा राय लिएर परराष्ट्र मन्त्रालयमार्फत् गर्नुपर्ने बताए ।