निजामती कर्मचारी सम्बद्ध विभिन्न संघसंस्थाले संघीय संसदको चालू अधिवेशनबाट संघीय निजामती सेवा ऐन जारी गर्न माग गरेका छन् ।

बुधवार प्रेस विज्ञप्ति जारी गर्दै ५ संघसंगठनले ऐन नहुँदा कर्मचारीको वृत्तिविकास र मनोबलमा असर परेको जनाएका छन् ।

नेपाल निजामती कर्मचारी संगठनका अध्यक्ष लेखनाथ कोइराला, नेपाल निजामती कर्मचारी युनियनका अध्यक्ष गोपालप्रसाद पोखरेल, नेपाल राष्ट्रिय कर्मचारी संगठन निजामतीका अध्यक्ष हरिबहादुर रावल, एकीकृत सरकारी कर्मचारी संगठन नेपालका अध्यक्ष मोहनकुमार घिमिरे र नेपाल मधेशी निजामती कर्मचारी मञ्चका अध्यक्ष भूवनेश्वर चौधरीले संयुक्त विज्ञप्ति जारी गर्दै ऐनको माग गरेका छन् ।

‘सम्पूर्ण राष्ट्रसेवक कर्मचारीहरूको मनोभावना अनुरूप संघीय संसदको चालू अधिवेशनबाट संघीय निजामती सेवा ऐन जारी नभएको खण्डमा संघर्षका कार्यक्रमहरू अगाडि बढाउन संयुक्त ट्रेड युनियन सञ्जालको बैठकबाट आन्दोलनको तयारीका लागि संयुक्त संघर्ष समितिहरू गठन गरिएको व्यहोरा यसै विज्ञप्तिमार्फत जानकारी गराउँदै उक्त आन्दोलनबाट उत्पन्न हुनसक्ने परिस्थितिको जिम्मेवार स्वयं नेपाल सरकार हुने जानकारी समेत गराउन चाहन्छौं,’ विज्ञप्तिमा उल्लेख छ ।