पाल्पाको रामपुर नगरपालिकाले स्वास्थ्य सेवा विस्तार गर्न भौतिक संरचनामा जोड दिएको छ ।

नगरपालिकाले आधारभूत स्वास्थ्य सेवा वडाबाटै निःशुल्क उपलब्ध गराउने गरी वडावडामा आधारभूत स्वास्थ्य केन्द्रको संरचना तयार पारेर सेवा दिन थालेको छ । 

बुधवार मात्रै रामपुरमा ३ वटा आधारभूत स्वास्थ्य केन्द्रको नवनिर्मित भवन उद्घाटन गरिएको छ । वडा नम्बर ४, ७ र ९ मा स्वास्थ्य सेवा प्रभावकारी बनाउन संरचना निर्माण गरिएको हो ।

वडा नम्बर ४ मा २८ लाख ८५ हजार ५७९ रुपैयाँको लागतमा भवन निर्माण गरी सेवा दिइएको छ । भ्याटबाहेक ३० लाख २० हजार ८०५ रुपैयाँमा ठेक्का सम्झौता भएको भवन एकतले ३ कोठासहित निर्माण गरिएको हो ।

वडा नम्बर ७ मा ३२ लाख ३४ हजार ५४० र वडा नम्बर ९ मा ३३ लाख ९५ हजार ८१३ रुपैयाँको लागतमा स्वास्थ्य केन्द्रको भवन निर्माण गरिएको हो । नगर स्वास्थ्य शाखा संयोजक गिरीराज घिमिरेले रामपुर नगरभित्र सबै स्वास्थ्य संस्था आफ्नै भवनमा सञ्चालन भएको बताए । रामपुर नगरभित्र एक ५० शय्याको रामपुर अस्पताल, ४ वटा स्वास्थ्य चौकी (गाँडाकोट, दर्छा, खालिवन र गेझा), ५ वटा आधारभूत स्वास्थ्य केन्द्र, ७ वटा शहरी स्वास्थ्य केन्द्र सञ्चालनमा छन् । 

‘नगरपालिकाभित्र कुनै पनि स्वास्थ्य संस्था भाडामा नरहेको र अबको १ वर्षभित्र नयाँ बन्न बाँकी रहेका सबै स्वास्थ्य संस्थाको भवन निर्माण सक्ने योजना छ, वडा नम्बर १ को चण्डिहान, ३ को गण्डकीढिक, १० को जगटेआँपमा पक्की स्वास्थ्य भवन बन्नेछ,’ प्रमुख घिमिरेले भने ।

रामपुर–४ का वडाध्यक्ष तथा स्वास्थ्य केन्द्र व्यवस्थापन समितिका अध्यक्ष रामबहादुर रानाले वडा–वडामा आधारभूत स्वास्थ्य केन्द्रले नागरिकलाई स्वास्थ्य सेवामा राम्रो सुविधा पुगेको बताए । करीब १ घण्टा बढीको समय पैदल हिँडेर स्वास्थ्य संस्थामा धाउनुपर्ने समस्या अहिले वडामै रहेको आधारभूत स्वास्थ्य केन्द्रको भवनबाट औषधोपचार सेवा पाउँदा नागरिकलाई ठूलो राहत पुगेको हसिना मियाँ बताउँछिन् ।

उनी भन्छिन्, ‘सामान्य औषधोपचारका निम्ति १ घण्टा धेरै समय हिँडेर रामपुर अस्पतालमै जानुपर्ने बाध्यता थियो, घर नजिकै सञ्चालन भएको स्वास्थ्य केन्द्रबाट आफूले भनेको समयमा सेवा पाइएको छ, हामी यसमा धेरै खुशी छौं ।’