विराटनगरका उद्योगी–व्यवसायीले सरकारविरुद्ध आन्दोलन शुरू गरेका छन् ।

आर्थिक विधेयक २०७९/०८० मा जीआई वायर, वनस्पति घ्यू तेल र स्यानेटरी प्याडका उद्योगलाई संकट पार्ने गरी कर बढाइएको भन्दै व्यवसायी आन्दोलित भएका छन् ।

‘बजेट वक्तव्यमा फलामे कच्चा पदार्थ एमएस वायर रडको भन्सार महशुललाई ५ प्रतिशतबाट बढाएर १० प्रतिशत बनाइएको छ । भन्सार विन्दुमा एमएसमा लाग्दै आएको प्रतिकिलो २ रुपैयाँ ५० पैसाको अन्तःशुल्कलाई ४ रुपैयाँ ५० पैसा बनाइएको छ,’ मोरङ व्यापार संघका अध्यक्ष नवीन रिजालले भने, ‘एमएसबाट उत्पादन गरिने जीआई वायरको पैठारी भने साफ्टा अन्तर्गत ६ प्रतिशत भन्सार महशुलमा गर्न सकिने व्यवस्था छ । यस्तो नीतिका कारण देशभरिमा एमएसमा आधारित १०० भन्दा बढी उद्योग बन्द हुन सक्छन् । ’

नयाँ बजेटले तयारी स्यानेटरी प्याडको पैठारी १.५ प्रतिशत भन्सार महशुलमा गर्न पाइने सुविधा दिएको छ । अर्कातिर देशका स्यानेटरी प्याडहरूले पैठारी गर्ने कच्चा पदार्थको औसत भन्सार महशुल ७.५ प्रतिशत भएको उद्योगीले बताएका छन् । आत्मनिर्भर भइसकेको स्यानेटरी प्याड उद्योग सरकारी कदमका कारण बन्दको स्थितिमा पुगेको भन्दै व्यवसायीले आन्दोलन शुरू गरेका छन् ।