नेपाल प्रहरीको केन्द्रीय अनुसन्धान ब्यूरोले बैंकिङ कसूर मुद्दामा फरार रहेका आरोपी २८ वर्षीय अरुण खड्कालाई पक्राउ गरेको छ ।

ब्यूरोका प्रवक्ता प्रहरी उपरीक्षक श्यामकुमार महतोले बिहीवार प्रेस विज्ञप्ति जारी गर्दै खड्कालाई पक्राउ गरिएको जनाएका छन् ।

खातामा पैसा नभई झुक्याएर चेक दिएको मुद्दामा उच्च अदालत पाटनबाट बैंकिङ कसूर तथा सजाय ऐन २०६४ बमोजिम कैद तथा जरिवाना हुने ठहर भएकोमा सजाय बेरुजु भई फरार रहेका उनलाई बुधवार तीनकुनेबाट पक्राउ गरिएको हो । पक्राउपछि प्रहरीले फैसला कार्यान्वयनका लागि ललितपुर जिल्ला अदालतमा पेश गरेको छ ।

रामेछापको लिखु तामाकोशी गाउँपालिका–५ घर भई कोटेश्वर बस्ने खड्कालाई अदालतले ४ वर्ष कैद र १० लाख १२ हजार रुपैयाँ जरिवाना गरेको छ । अदालतले २०७८ चैत ७ गते मुद्दाको फैसला गरेको थियो ।