स्वास्थ्य बीमा बोर्डले बीमितहरूलाई नियमित रूपमा स्वास्थ्य सेवा प्रवाह गर्न सम्पूर्ण सेवा प्रदायक स्वास्थ्य संस्थालाई अनुरोध गरेको छ ।

कतिपय संस्थाले बीमा रकम भुक्तानी नपाएको भन्दै बीमा सेवा स्थगन गरेपछि बोर्डले नियमित सेवा दिन अनुरोध गरेको हो ।

बोर्डका कार्यकारी निर्देशकले बिहीवार प्रेस विज्ञप्ति जारी गर्दै सेवा प्रवाह गर्न आग्रह गरेका छन् । बोर्डले कर्मचारीको अभावका कारण बीमा रकम भुक्तानीका लागि आएका दाबी परीक्षण हुन नसक्दा भुक्तानीमा ढिलाइ भएको जनाउँदै १२ महिना नै भुक्तानी हुने स्पष्ट पारेको छ ।

आर्थिक वर्षको अन्त्यमा रकम भुक्तानी नहुने हो कि भन्ने आशंकामा सेवा स्थगन गरिएका सूचना आइरहेको सन्दर्भमा बीमा बोर्डले सबै भुक्तानी हुने स्पष्ट पारेको छ ।