रिक्त ३२ वरिष्ठ प्रहरी उपरीक्षक (एसएसपी) पदका लागि प्रहरी उपरीक्षक (एसपी)हरूको दौडधूप शुरू भएको छ । 

गृह मन्त्रालयले असार ८ गते १७ जना एसएसपीलाई प्रहरी नायब महानिरीक्षक (डीआईजी)मा बढुवा सिफारिश गरेसँगै एसएसपीका लागि एसपीहरूको दौडधूप शुरू भएको हो  । 

२०७४ साउन १९ गते बढुवा भएका ३५ जना एसपी बढुवाका लागि दौडमा देखिएका छन्, त्यसमध्ये २ जनाले अनिवार्य अवकाश पाएका छन् । 

२०७२ फागुन १९ मा बढुवा भएका डिल्लीराज विष्ट बढुवाको पहिलो सूचीमा छन् । उनी निर्मला प्रकरणमा पनि मुछिएका थिए । विष्टसँगै २०५१ मा भर्ना भएकाहरू डीआईजीको लाइनमा पुगिसकेका छन् ।

२०७४ असार १९ मा बढुवा भएका एसपीहरू गणेश चन्द, ओमबहादुर राना, राजधन अधिकारी, ईश्वर कार्की,  मनोजकुमार केसी, रेवती ढकाल, दानबहादुर कार्की, दिनेश कुमार आचार्य, अरुण पौडेल, राजेन्द्रप्रसाद भट्ट, किसन सिंह थापा, गोविन्द थपलिया, सुर्दशनप्रसाद कोइराला, जीवनकुमार श्रेष्ठ (क), दीपक रेग्मी र लोकेन्द्र श्रेष्ठ बढुवाको लाइनमा छन् ।

उनीहरू २०५४ चैत १८ गते भर्ना भएका हुन् भने रेवती ढकाल र दिल्लीराज विष्ट २०५१ भदौ १६ मा भर्ना भएका थिए । 

२०५३ मा भर्ना भएर राष्ट्रिय अनुसन्धानबाट आएका सिद्धिविक्रम शाह, सुशिलसिंह राठोर, माधवप्रसाद श्रेष्ठ, डम्बरबहादुर विक, उमाप्रसाद चतुर्वेदी, सुरेन्द्रबहादुर गुरुङ, हिमालयकुमार श्रेष्ठ, विमल बस्नेत, मनोजकुमार यादव, विनोद घिमिरे, दीपककुमार बस्नेत, जयराज सापकोटा, शारदाप्रसाद चौधरी, दीपेन्द्र घर्ती क्षेत्री, रामेश्वर यादव, दिलिपसिंह देउवा र सञ्जीव शर्मा दास गरी १९ पनि बढुवाको लाइनमा छन् ।

२०७५ जेठ २९ गते बढुवा भएको टोलीले पनि बढुवाका लागि शक्तिकेन्द्रको ढोका चहारिरहेको छ । राष्ट्रिय अनुसन्धानको टोलीले आफूहरू अगाडि बढुवा भएकाले माथि ल्याउनुपर्ने भन्दै लबिङ गरिरहेको छ ।

‘राष्ट्रिय अनुसन्धानकाहरू हामीमाथि आउनुपर्छ भन्दै लबिङमा लागेका छन्,’ एक प्रहरी उच्च अधिकारीले लोकान्तरसँग भने ।

राष्ट्रिय अनुसन्धानबाट आएका र प्रहरीतर्फ भर्ना भएका अधिकारीहरूबीच जहिले पनि बढुवा र सरुवामा विवाद देखिँदै आएको छ । 

प्रहरीतर्फ भर्ना भएकाले आफूहरूले द्वन्द्वको समयमा फिल्डमा गरेको कामको अवमूल्यन हुने गरी राष्ट्रिय अनुसन्धानबाट आएकालाई अगाडि ल्याउन नहुने तर्क गर्ने गरेका छन् ।

एसपीबाट एसएसपीमा बढुवा सिफारिश प्रहरी महानिरीक्षकको अध्यक्षतामा गृहमन्त्रालयको सहसचिव सदस्य र प्रहरी महानिरीक्षकले तोकेको प्रहरी अतिरिक्त महानिरीक्षक सदस्य सचिवले गर्ने व्यवस्था प्रहरी नियमावली २०७१ नियम २७ (ग)मा रहेको छ । 

बढुवा गर्दा नियम ३० को उपनियम २ अनुसार कार्यसम्पादन मूल्यांकन, ज्येष्ठता, भौगोलिक क्षेत्रमा काम गरेको अनुभव, शैक्षिक योग्यता, तालिम, चूनौतीपूर्ण वा विशेष जिम्मेवारी र बढुवा समितिले दिने अंक हेरिनुपर्ने व्यवस्था छ ।