मोरङको बेलबारी नगरपालिकाले उपमेयरका लागि गाडी खरिद नगर्ने भएको छ । 

असार १० गते शुक्रवार भएको नगर सभाले गाडी खरिद गर्नका लागि बजेट विनियोजन नगरेको हो । 

नगरपालिकाले बजेट ल्याउनु पूर्व तयार पारेको सिलिङ बजेटमा ८० लाख रूपैयाँ सवारीसाधन खरिद गर्ने शीर्षक राखिएको थियो । 

‘विलासी उपमेयरको नयाँ गाडी चढ्ने सोख’ शीर्षकमा असार १ गते लोकान्तरमा समाचार प्रकाशन भएपछि नगरपालिका गाडी किन्ने निर्णयबाट पछि हटेको हो । 

समाचार प्रकाशनपछि चर्काे विरोध भएको थियो । त्यसपछि सोही रकममा केही रकम थप गरेर नगरपालिकाले नगर बस सञ्चालनका लागि बजेट विनियोजन गरेको छ ।

नगर बस खरिद गर्न एक करोड बजेट नगर सभामा पेश भएको  नगरपालिकाका लेखा शाखा प्रमुख धना तामाङले बताइन् । उनले अन्य सवारीसाधन खरिद गर्न भनेर बजेट नछुट्याइएको जानकारी दिइन् । 

यस विषयमा बुझ्न खोज्दा उपमेयर नितु थापा कोइरालाले आफू व्यस्त रहेको र केही बुझ्ने भए मेयरसँग बुझ्न भन्दै टारिन् । 

मेयर दिलप्रसाद राई (डीपी)सँग टेलिफोन सम्पर्क हुन सकेन । पटक–पटक सम्पर्क गर्न प्रयास गर्दा पनि उनले फोन उठाएनन् । 

नगरपालिकाले आर्थिक वर्ष २०७९/८० का लागि एक अर्ब ३७ करोड ५२ लाख ८ हजार ४३३ अनुमानित बजेट प्रस्तुत गरेको छ । 

उपमेयर कोइरालाले आफूले चढ्ने गाडी पुरानो भएको भन्दै बजेट छुट्याउन माग गरेकी थिइन् । जेठ २९ गते आइतवार बसेको कार्यपालिका बैठकले गाडी किन्ने प्रस्ताव नगर सभाबाट पास गर्ने निर्णय गरेको थियो ।  

तर, निर्णयको चर्काे विरोध भएपछि मेयर राईले निर्णयमा हस्ताक्षर गरेका थिएनन् ।