मोरङको सुन्दरहरैंचा नगरपालिकास्थित कनकलक्ष्मी बचत तथा ऋण सहकारी संस्थामा बचतकर्ताको रकम कर्मचारीले हिनामिना गरेको खुलेको छ । कर्मचारीले ३१ लाख रुपैयाँ हिनामिना भएको पाइएको छ ।

सहकारीको सेवा केन्द्र गोठगाउँमा कार्यरत कर्मचारी विवेक खवासले ३१ लाख रुपैयाँ हिनामिना गरेको आरोपमा उनलाई सञ्चालक समितिले बर्खास्त गरेको छ । 

विगत ५–६ महिनादेखि बचतकर्ताको रकम आफैं नक्कली हस्ताक्षर गरेर ३१ लाख रुपैयाँ हिनामिना गरेको पाइएको कनकलक्ष्मी बचत तथा ऋण सहकारी संस्थाका अध्यक्ष अर्जुनराज अधिकारीले बताए । ‘चिनजानका व्यक्तिले रेमिट्यान्सबाट पठाएको पैसा निकालेर खातामा राख्न अह्राउँदा सो पैसा आफैं लग्ने गरेका रहेछन्,’ अधिकारीले भने, ‘सफ्टवेयरको प्रयोगबाट कारोबार हुने गरे पनि उनले सफ्टवेयरको प्रयोग नै नगरी नक्कली कागजात बनाई रकम आफैं लगेका रहेछन् ।’ 

बचतकर्ताले आफ्नो बचत लिनका लागि आउँदा बचत रकम आफ्नो खातामा नभएपछि हिनामिनाको घटना बाहिरिएको हो । सहकारीका प्रमुख कार्यकारी अधिकृत नै पुगेको बेला बचतकर्ता आफ्नो बचत झिक्न आएका थिए । बचत गरेको रकम खातामा नभेटिएपछि उनलाई गछिया प्रहरी चौकीमा जिम्मा लगाइएको थियो ।

प्रहरी चौकीमा पुगेपछि उनले रकम हिनामिना गरेको स्वीकार गरेको अध्यक्ष अधिकारीले बताए । आरोपीले हिनामिना गरेको स्वीकार गरेपछि भदौ १० गतेसम्ममा हिनामिना गरेको रकम तिर्ने सहमति भएको थियो ।

उनले १० लाख रुपैयाँ सहकारीलाई तिरिसकेका प्रमुख कार्यकारी अधिकृत शेखर भट्टराईले बताए । हिनामिना रकम उनले अन्यत्र लगानी गरेको हुनसक्ने सञ्चालक समितिको अनुमान छ ।

७ नम्बर वडाका वडाध्यक्ष भुवनसिंह आले मगर र ३ नम्बर वडाका वडाध्यक्ष विदुर ढुंगानासहित संस्थाका प्रतिनिधि बसेर कर्मचारीले हिनामिना गरेको रकम असूलउपर गर्ने गरी लिखित कागज समेत गरेका छन् । 

शेयर सदस्यहरूले भने एक जना कर्मचारीले मात्रै हिनामिना गर्न आँट नगर्ने बताउँदै नगरपालिकाले नै छानबिन गर्नुपर्ने बताउँदै आएका छन् । 

सञ्चालक समितिका सचिव एमप्रसाद सिग्देलको संयोजकत्वमा छानबिन समिति समेत बनाइएको छ । समितिको सदस्यमा लेखा समितिका संयोजक युवराज आचार्य र लेखा प्रमुख विराटचन्द्र पोख्रेल छन् । अनियमितताको रकम अझ बढ्नसक्ने अनुमान गरेर छानबिन समिति बनाइएको अधिकारीले बताए । 

रकम हिनामिना गर्ने कर्मचारी गोठगाउँमा रहेको सेवा केन्द्रको काउन्टरमा बस्ने सहायक कर्मचारी हुन् । प्रहरीले जाहेरी नआएकाले थप अनुसन्धान नगरेको जनाएको छ ।

आन्तरिक विषय भएकाले मिलाउने भनेर सञ्चालक समितिले जाहेरी नदिएकाले थप अनुसन्धान नगरेको मोरङ प्रहरीले जनाएको छ ।

संस्थाका ६ वटा सेवा केन्द्र छन् । सहकारीमा ८ हजार शेयर सदस्य छन् । सुन्दरहरैंचामा कार्यक्षेत्र भएका ८ सहकारी संस्था २०७७ असार २९ गते मर्ज भएका थिए । मर्जपछि कनकलक्ष्मी बचत तथा ऋण सहकारी संस्थाको नाममा कारोबार भएको थियो ।

सुन्दरपुर बचत तथा ऋण सहकारी संस्था, गछिया बचत तथा ऋण सहकारी संस्था, गुराँस बचत तथा ऋण सहकारी संस्था, शुभलक्ष्मी बचत तथा ऋण सहकारी संस्था, न्यु नमूना बचत तथा ऋण सहकारी संस्था, पिण्डेश्वरी बचत तथा ऋण सहकारी संस्था, घरआँगन बचत तथा ऋण सहकारी संस्था र प्रारम्भ बचत तथा ऋण सहकारी संस्था एकआपसमा गाँभिएर कनकलक्ष्मी बचत तथा ऋण सहकारी संस्था बनेको थियो ।