हिमालयन बैंक लिमिटेडले आफ्नो संस्थागत सामाजिक उत्तरदायित्व पूरा गर्ने उद्देश्यले कैलाली जिल्लाको लम्कीचुहा नगरपालिकामा वित्तीय साक्षरता कार्यक्रम तथा शैक्षिक सामाग्री वितरण सम्पन्न गरेको छ । 

बैंकले नगरपालिकाको वडा नं. ०२ स्थित श्री जनसेवा माध्यामिक विद्यालयमा सो वित्तीय साक्षरता तथा शैक्षिक सामाग्री वितरण कार्यक्रम  शुक्रवार सम्पन्न गरेको हो ।

विद्यार्थीहरूलाई वित्तीय सचेतना अभिबृद्धि गर्नका लागि संस्थागत सामाजिक उत्तरदायित्व अन्तरगत देशव्यापी रुपमा यस्ता कार्यक्रमहरू सञ्चालन गर्दै आएकोमा सूदुरपश्चिम प्रदेश कार्यालयले समेत उक्त कार्यक्रम सञ्चालन गरेको   बैंकका सुदूरपश्चिम प्रदेश प्रमुख सरोज रेग्मीले जानकारी दिए । 

जिल्लाका विभिन्न क्षेत्रहरूमा वित्तीय सचेतना अभिबृद्धि गर्ने कार्यक्रमको प्रमुख उद्धेश्य रहेको रेग्मीले बताए ।

शुक्रवार सम्पन्न कार्यक्रम विशेष गरी विद्यालयका कक्षा १० मा अध्ययनरत विद्यार्थीहरू तथा अभिभावकहरूको लागि आयोजना गरिएको थियो । 

कार्यक्रममा अभिभावक, शिक्षक–शिक्षिका, विद्यार्थीहरू लगायत करिब १५० जनाको सहभागिता रहेको थियो । 

विद्यालयका प्रधानाध्यापक मित्रलाल चौधरीको सभापतित्वमा सम्पन्न कार्यक्रममा बैंकका सुदुर पश्चिम प्रदेश प्रमुख सरोेज रेग्मी, लम्की शाखाका शाखा प्रबन्धक युवराज थापाले वित्तीय साक्षरताको बारेमा जानकारी प्रस्तुत गरेका थिए ।

सोही कार्यक्रममा बैंकले कक्षा १० मा अध्ययनरत विद्यार्थीहरूलाई वित्तीय साक्षरता  सामग्री सहितको अभ्यास पुस्तिका वितरण गरेको थियो ।