२६ जेठ २०८३, मंगलबार
अस्ट्रेलियामा नेपाली मूलका व्यक्तिहरूको संख्या बढेको ताजा जनगणनामा देखिएको छ ।
द गार्डियन पत्रिकामा छापिएको खबरअनुसार, उक्त देशमा रहेका आप्रवासीमध्ये नेपालीहरू शीर्ष ११औं स्थानमा छन् ।
भारतीयपछि नेपालीहरूको संख्या अस्ट्रेलियामा ह्वात्तै बढेको पाइएको छ ।
सन् २०२१ मा गरिएको जनगणनामा थप ७० हजार नेपालीको गणना गरिएको थियो । त्यो अघिल्लोभन्दा १२३.७ प्रतिशतको वृद्धि हो । जनगणनामा नेपालीको कुल संख्या एक लाख २२ हजार ५०६ पाइएको छ ।
सन् २०१७ पछि अधिकांश नेपाली आप्रवासीहरू स्किल्ड र पार्टनर भिजामा आएको अस्ट्रेलियाको गृह मन्त्रालयले जनाएको छ । नेपालीहरूमाझ नर्सिङ, अकाउन्टिङ र कूक सबभन्दा लोकप्रिय व्यवसाय हुन् ।
बिजनेस डेभलोपमेन्ट म्यानेजर मदनमणि अधिकारी सन् २०१९ मा अस्ट्रेलियाका स्थायी बासिन्दा बनेका थिए । उनी नेपालबाट त्यहाँ अन्तर्राष्ट्रिय विद्यार्थीका रूपमा पुगेका थिए ।
अधिकारीका अनुसार, युवा नेपालीहरूले देशमा करीयर बनाउन संघर्ष गर्नुपर्छ तर अस्ट्रेलियाले सेटल हुनका लागि विशाल अवसर दिन्छ ।
‘उता नेपालमा धेरै मानिसलाई अस्ट्रेलियाको जीवनशैली र अवसरको बारेमा जानकारी छ,’ उनले बताए ।
‘यहाँ मानिसहरूले सजिलै उपलब्धि हासिल गरेको उनीहरू देख्छन् । नेपालमा त्यो उपलब्धि पाउन निकै गाह्रो छ । नेपालीहरू मिहिनेती र काममा लगनशील हुन्छन् तर नेपालमा राजनीतिक अस्थिरता र न्यून आर्थिक वृद्धि छ । त्यसले पनि नेपालीहरूलाई अस्ट्रेलिया जान प्रेरित गरेको छ,’ उनले थपे ।
