नेकपा एमालेका अध्यक्ष एवं पूर्व प्रधानमन्त्री केपी शर्मा ओलीले अमेरिकी सैन्य सम्झौता राज्य साझेदारी कार्यक्रम (एसपीपी) सम्बन्धमा गरिएको पत्राचारमा छली काम भएको दाबी गरेका छन् । 

नेपाली सेनाले अमेरिकी दूतावासलाई पठाएको पत्रको मिति र चलानी नम्बर मात्र आफू प्रधानमन्त्री बनेको समयमा राखिएको उनले दाबी गरे । 

मदन भण्डारी फाउण्डेसनले आयोजना गरेको कार्यक्रमलाई सम्बोधन गर्दै अध्यक्ष ओलीले एसपीपी सन् २०१९ सालमा स्थगित गरिए पनि सत्ता गठबन्धनले अर्को घातक ड्राफ्ट ल्याएको आरोप लगाए । 

‘एसपीपीलाई पठाइएको पत्रमा मिति २७ हातले लेखिएको छ, त्यसमा केरमेट गर्नुभयो । किनभने ओलीलाई मुछ्नको लागि लेखिएको हो । चलानी नम्बर फेरिएको छ । छली काम भएको छ,’ ओलीले भने, ‘यो पत्र म प्रधानमन्त्री नहुँदै दूतावासमा पठाइएको हो, अमेरिकी दूतावासले सत्य बोलोस् भन्ने म चाहन्छु ।’ 

ओलीले मितिको २७ अंक किन हातले लेखियो भनेर प्रश्न गरे । ‘अहिले आएर जालसाजी गरिएको छ । म प्रधानमन्त्री रहेको समयमा सन् २०१९ मा स्टप भइसकेको कुरा हो, अहिले अर्को डाफ्ट ल्याएर भित्रभित्रै नेपालको असंलग्नता तटस्थतालाई लत्याएर एउटा गलत चिज अगाडि सार्न खोजियो,’ ओलीले भने, ‘गलत चिज अगाडि सार्न खोजेर देशको परराष्ट्र नीतिलाई गम्भीर घाटा पार्ने काम रद्द गरेका छौं ।’ 

ओलीले एमसीसी पास गर्ने गठबन्धनले कुनै पनि बेला एसपीपी ब्यूँताउन सक्ने आशंका व्यक्त गरे । ‘खतरा छँदैछ यो गठबन्धनका मान्छेहरू एमसीसीमा हात उठाएर पास गरेका हुन्,’ उनले भने, ‘पानीको भेल शान्त हुनेबित्तिकै जसरी माझीले जाल लिएर माछा मार्न जान्छ, भेल शान्त हुनेबित्तिकै अर्को जाल लिएर उनीहरू एसपीपीमा सामेल हुनेछन् ।’