काँग्रेसका युवा नेता शंकर तिवारीले नवलपुर क्षेत्र नम्बर २ बाट संघीय निर्वाचनमा उम्मेदवार बन्न दाबेदारी प्रस्तुत गरेका छन् ।  जुन क्षेत्रमा उद्योगपति तथा काँग्रेस नेता बिनोद चौधरीले पनि दाबी प्रस्तुत गरेका छन् । 
मंगलबार सामाजिक सञ्जालमार्फत तिवारीले  आफूसँग प्रत्यक्ष र अप्रत्यक्ष रुपमा संवादमा आएका बुङदी काली , कावासोती, मध्यबिन्दु,  हुपसेकोट हुँदै विनयी त्रिवेणीसम्मका नेतागणदेखि मतदाता सम्मको सल्लाह, आशीर्वाद, आग्रह, शुभकामना  मुताबिक नवलपुर २ बाट उम्मेदवारीमा  दावा रहने बताएका हुन् । 

उनले स्थानीय निर्वाचनले अभूतपूर्व राजनीतिक परिवर्तनको सन्देश दिएको उल्लेख गर्दै भनेका छन्, ‘ त्योसँगै राष्ट्रिय राजनीति र  नवलपुरको राजनीतिक सरगर्मी पनि ह्वात्तै बढेको छ। नवलपुर २ मा गत निर्वाचनमा  नेपाली कांग्रेसतर्फबाट उपबिजेता विष्णु कार्कीको स्थानीय रुपमा लोकप्रियता  निर्विवाद छ भने  अर्का तर्फ व्यवसायी विनोद चौधरीले पनि आफ्नो प्रत्यक्षतर्फको आकांक्षा  नवलपुर–२ मा रहेको घोषणा गरेका छन्। यो सबैको बावजूद परम्परागत राजनीतिमा बदलाव खोजिरहेका,  युवा पुस्ता र पहिलो पटक भोट हाल्ने मतदाता  माझ अर्कै लहर पनि चलिरहेको छ। उनीहरुले राजनीतिमा पुस्तान्तरण खोजिरहेका छन्।’
काँग्रेस महामन्त्री गगन थापा निकट मानिने उनी गत महाधिवेशनमा केन्द्रीय सदस्य पदमा पराजित बनेका थिए ।