टर्कीले फिनल्यान्ड र स्विडनलाई नेटोमा जोडिनका लागि तेर्स्याएको अवरोध खोलिदिएको छ ।

हिजोदेखि स्पेनको राजधानी मड्रिडमा शुरू भएको नेटो शिखर सम्मेलनका क्रममा ती दुई मुलुक र टर्कीबीच सहमति बनेको फिनल्यान्डका राष्ट्रपति साउली नीनिस्तोले बताएका छन् । नीनिस्तोले मंगलवार टर्कीका राष्ट्रपति रेचेप तैयिप एर्दोआन र स्विडनकी प्रधानमन्त्री म्याग्डालेना एन्डरसनसँग बैठक गरेपछि अवरोध फुकेको हो । 

उक्त बैठकमा तीन मुलुकले एक समझदारी पत्रमा हस्ताक्षर गरेका थिए । त्यसका लागि नेटोका महासचिव जेन्स स्टोल्टनबर्गले समन्वय गरेका थिए । 

फिनल्यान्ड र स्विडनले सबै प्रकारका आतंकवादलाई निन्दा गर्ने तथा टर्कीले आतंकवादी भनेका संगठनहरूलाई समर्थन नदिने सहमति गरेपछि कुरा मिलेको हो । ती दुई देशमा रहेका कुर्दिश समूह पीकेके र वाईपीजी तथा फेटोलाई टर्कीले आतंकवादी समूह मान्ने गरेको छ ।

‘टर्कीले चाहेको कुरा पायो,’ एर्दोआनले सम्झौता घोषणा भएपछि बयान जारी गरेर बताए । 

उक्त बैठकपछि आयोजित पत्रकार सम्मेलनमा स्टोल्टनबर्गले मड्रिड शिखर सम्मेलनमा फिनल्यान्ड र स्विडन पर्यवेक्षकको हैसियतमा सहभागी हुने बताए । समझदारीमा आतंकवाद तथा हतियार निर्यातविरुद्ध लड्ने प्रावधान पनि रहेको स्टोल्टनबर्गले जानकारी दिए ।