तीज आउन दुई महिना बाँकी रहँदा तीज गीत सार्वजनिक हुने क्रम शुरू भएको छ । असार १५ सँगै तीज गीत सार्वजनिक हुन थालेका हुन् । 

लोक गायक खुमन अधिकारी र लोक गायिका शान्तीश्री परियारको स्वरमा ‘थरी थरी भोले’बोलको तीज गीत बिहीवार बिहानमात्रै सार्वजनिक भएको छ । 

यस गीतका शब्द प्रत्यक्ष दोहोरी कलाकार संघका अध्यक्षसमेत रहेका सर्जक एवं गायक रविन लामिछानेले लेखेका हुन् । गायक खुमनकै संगीत रहेको गीतलाई सुनिल परियारले एरेन्ज गरेका छन् । 

गायत्री थापाको निर्देशन रहेको गीतको भिडियोमा गायक खुमन अधिकारी स्वयंसँगै मोडल अञ्जली अधिकारी र अभिषेक खड्का प्रस्तुत छन् । 

जेरी भण्डारीको छायाँकन रहेको भिडियो नविन घर्ती मगरको सम्पादनपछि ‘शिव दर्शन फिल्मस्’ युट्युब च्यानलमार्फत सार्वजनिक भएको हो । 

गायिकाद्वय एलिना चौहान र स्वस्तिका ढकालको स्वरमा ‘भो माया चाहिँदैन्’बोलको तीज गीत पनि सार्वजनिक भइसकेको छ । 

गम्भिर विष्टको निर्देशनमा तयार यस गीतको भिडियोमा मोडलद्वय गीता ढुंगाना र कविता न्यौपानेको नृत्य रहेको छ । गायिका सुजाता पाण्डेको स्वरमा ‘नाच्छु मजैले’बोलको तीज गीत पनि सार्वजनिक भैसकेको छ । मनिष पन्तको निर्देशनमा तयार भिडियोमा मोडल अञ्जली अधिकारीको नृत्य हेर्न सकिन्छ ।

गायक एवं सर्जक सन्तोष केसीले अञ्जु पन्त र बादल थापा मगरको स्वरमा ‘सिम सिमे बर्खाको पानी’बोलको तीज गीत सार्वजनिक गरिसकेका छन् । निर्देशक प्रकाश भट्ट, काजिश श्रेष्ठ, स्मृति तिमिल्सिना ‘गुरुआमा’ लगायतको निर्देशनमा छायाँकन भएका तीज गीतहरू पनि छिट्टै सार्वजनिक हुने तयारीमा छन् ।

यस वर्षको तीज भदौ १४ गते परेको छ । 

तीजलाई लक्षित गरेर हरेक वर्ष दर्जनौं गीतहरू सार्वजनिक हुँदै आएका छन् ।

तीज गीतमा हरेक वर्ष विकृतिका कुराहरू सुन्ने गरिन्छ । केही कलाकारहरूले भाइरल हुने मोहमा दुईअर्थी अपाच्य खालका तीजगीतहरू समेत ल्याउँदै आएका छन् ।

राष्ट्रिय लोक तथा दोहोरी गीत प्रतिष्ठानले दुईअर्थी, अपाच्य खालका तीजगीतहरू नल्याउन हरेक वर्ष अपिल समेत गर्दै आएको छ ।

यसवर्ष पनि दोहोरीगीत प्रतिष्ठानले अपाच्य श्रव्यदृश्य सामाग्रीहरू प्रयोग नगर्न अनुरोध गर्दै अपिलपत्र जारी गरिसकेको छ ।