बक्यौता बाँकी राखेर सञ्चालनमा समेत नरहेका वायुसेवा सञ्चालकको बैंक खाता र पासपोर्ट रोक्का गर्ने सूचनापछि ६ वटा कम्पनी सम्पर्कमा आएका छन् । 

नेपाल नागरिक उड्डयन प्राधिकरणले बक्यौता बाँकी राखेका र हाल सञ्चालनमा नरहेका ९ वायुसेवालाई आफ्नो दायित्व भुक्तानी गर्न पटक–पटक सूचना जारी गरेको थियो ।

सम्बन्धित वायुसेवाले अटेर गरेपछि ६ चैतमा बक्यौता बाँकी राख्ने ती वायुसेवा सञ्चालकको बैंक खाता र पासपोर्ट नै रोक्का गरेर कारवाही गर्ने सूचना जारी भएको थियो । 

उक्त सूचनापछि थोरै बक्यौता भएका ६ वटा वायु सेवाले बक्यौता भुक्तानी गरेको हवाई क्षेत्रको नियामक निकाय नेपाल नागरिक उड्डयन प्राधिकरणले जानकारी दिएको छ ।

सञ्चालनमा नरहेका ९ वायुसेवाले प्राधिकरणलाई ९ करोड ३५ लाख १८ हजार रुपैयाँ तिर्न बाँकी थियो । त्यसमध्ये ६ वटाले आफ्नो दायित्व पूरा गरेको प्राधिकरणका प्रवक्ता जगन्नाथ निरौलाले बताए । 

प्राधिकरणले कारवाही गर्ने सूचना जारी गरेपछि नेकोन, शिवानी र कस्मिक एयरबाहेक आन्तरिक उडानका अरू सबैको बक्यौता भुक्तानी चुक्ता भएको छ ।

६ वटा कम्पनीले प्राधिकरणलाई ५९ लाख ८३ हजार ७३८ रुपैयाँ भुक्तानी गरेको प्राधिकरणका प्रवक्ता निरौलाले बताए ।

प्राधिकरणले कारवाही गर्ने सूचना जारी गरेर सञ्चालकमाथि कडा निगरानी बढाउने भन्दा पनि सम्पर्कमै नआएकालाई भने कारवाही हुने भएको छ ।

सम्पर्कमा नआउने वायुसेवाकै रकम धेरै भएकाले त्यसका सञ्चालकलाई कारवाही गर्न राष्ट्र बैंकसहितको सम्बन्धित निकायमा पत्र पठाइसकेको प्रवक्ता निरौलाले जानकारी दिए ।

निरौलाले भने, ‘प्राधिकरणले सरकारी दायित्व भुक्तानी नगर्ने वायुसेवालाई सम्बन्धित निकायको ऐन कानूनअनुसार कारवाही गर्न आग्रह गरिसकेको छ ।

यसका लागि नेपाल राष्ट्र बैंकलाई प्राधिकरणले आधिकारिक रूपमा पत्र समेत पठाइसकेकाले प्रक्रिया पुर्‍याएर कारवाही हुने निरौलाले जानकारी दिए ।

दायित्व भुक्तानी नगरी बस्ने र कारवाहीका लागि सिफारिश भएका वायुसेवामा नेकोन एयर, शिवानी एयर र कस्मिक एयर छन् । यी वायुसेवाको दायित्व अन्य ६ वटाको भन्दा बढी छ । 

प्राधिकरणका अनुसार सबैभन्दा बढी बक्यौता राख्नेमा नेकोन एयर छ । उसले ४ करोड ७२ लाख २५ हजार रुपैयाँ तिर्नुपर्ने छ । त्यसपछि कस्मिक एयरको ३ करोड ४७ लाख रुपैयाँ बक्यौता छ । 

कस्मिकले ६३ लाख ६२ हजार रुपैयाँ कारवाहीको सूचना जारी गर्नुअघि नै तिरेको फेला परेकाले उक्त रकमबाहेक नै कस्मिकले २ करोड ८४ लाख १८ हजार रुपैयाँ तिर्न बाँकी देखिएको प्राधिकरणको भनाइ छ ।

यो वायुसेवाको सञ्चालक क्याप्टेन रवीन्द्रप्रसाद प्रधान हुन् ।

प्राधिरकरणको कारवाहीको सूचनापछि समेत पनि सम्पर्कमा नआउनेमा शिवानी एयर पनि छ ।

यो वायुसेवाको सञ्चालक मणिन्द्रलाल रञ्जितकार हुन्  । उनले यो वायुसेवा सञ्चालन गर्दा प्राधिकरणलाई तिर्न बाँकी राखेको ५५ लाख ५१ हजार रुपैयाँ अझै भुक्तानी भएको छ ।

बाँकी रकम तिर्नुपर्ने दायित्व नेकोक एयरका ५ जना सञ्चालकको छ । यो वायुसेवाको ९ मंसिर २०६० को सञ्चालक समितिको विवरण अनुसार दीपमणि राजभण्डारी प्रबन्ध सञ्चालक र मुकुन्दभक्त श्रेष्ठ उपाध्यक्ष छन् ।

सञ्चालकमा भने दीपकराज कोइराला, रवीन्द्र श्रेष्ठ, मृगेन्द्र जोशी र रवीचन्द्रमान श्रेष्ठ छन् । 

हेर्नुहोस्, बक्यौताको विवरण :

प्राधिकरणलाई तिर्न बाँकी रहेको रकम धेरैथोरै जति भएपनि आफ्नो दायित्व भुक्तानी नगर्ने कम्पनी कारवाहीमा पर्ने प्राधिकरणको भनाइ छ ।

प्राधिकरणले पटक–पटक सूचना जारी गर्दा र बाँकी बक्यौता भुक्तानीका लागि आउन आग्रह गर्दा पनि ती वायुसेवा सञ्चालक सम्पर्कमै आएका छैनन् ।

निरौलाका अनुसार हालसम्म रकम भुक्तानी गर्नेमा गोरखा एयरलाइन्सको २० लाख ३५ हजार, कर्णाली एयरको १७ लाख ४३ हजार, स्काइलाइनको ७ लाख ८० हजार छ । 

एयर कास्टमन्डपको ७ लाख ३८ हजार रुपैयाँ असुल भएको छ भने माउन्टेन एयरको ६ लाख १० हजार र अल्पाइन एयरको ७२ हजार रुपैयाँ असुल भएको छ ।

प्राधिकरणका महानिर्देशक ई. प्रदीप अधिकारीले बक्यौतासम्बन्धी सम्पूर्ण विवरण संकलन गर्न लगाएर अटेर गर्नेहरूमाथि कारवाहीको प्रक्रिया अगाडि बढाएका हुन् । 

यसअघि प्राधिकरणले ७ असोज २०७६, २० माघ २०७७ र १२ भदौ २०७८ मा पनि सार्वजनिक सूचना जारी गरेर सम्बन्धित वायुसेवा कम्पनीलाई बक्यौता तिर्न आग्रह गरेको थियो ।

उक्त आग्रहलाई वेवास्ता गरिएकाले यसपटक प्राधिकरण आक्रामक भएर प्रस्तुत भएकाले नै ६ वटाले आफ्नो दायित्व चुक्ता गरेर कारवाहीबाट बचेका छन् । 

बक्यौता नतिर्ने वायुसेवालाई नागरिक उड्डयन प्राधिकरण ऐन, २०५३ को दफा २७ बमोजिम सरकारी बाँकीसरह असुलउपर गर्न पाउने अधिकार प्राधिकरणले प्रयोग गरेको हो ।

प्राधिकरणले विमानस्थल सेवा शुल्क नियमावली, २०७६ को नियम ३० (३०) अनुसार बुझाउनुपर्ने शुल्क नबुझाउने व्यक्ति तथा संस्थाहरूलाई कारवाही गर्न पाउँछ ।

सोही व्यवस्थाअनुसार सञ्चालनमा नरहेका र बक्यौता बाँकी राखेका ती वायुसेवालाई भविष्यमा हवाइ सेवा, विमानस्थल तथा प्राधिकरणसँग सम्बद्ध कुनै किसिमको काम कारवाही तथा व्यापार व्यवसायमा संलग्न हुने नपाउने गरी कारवाहीको प्रक्रिया अगाडि बढाइएको प्राधिकरणले जनाएको छ ।