नेत्रविक्रम चन्द नेतृत्वको नेकपानिकट विद्यार्थी संगठनले जनक शिक्षा सामग्री केन्द्र लिमिटेडका प्रमुख अनिलकुमार झालाई दुर्व्यवहार गरेका छन् । शुक्रवार दिउँसो करिब ३ बजेतिर भक्तपुरको सानोठिमीस्थित केन्द्र पुगेका चार जना विद्यार्थीहरूले झालाई मोसो दलेका हुन् । 

कार्यालय समय सकिएकाले अन्य सबै कर्मचारीहरू घर फर्किन लाग्दा कार्यालयमा प्रवेश गरेका उनीहरूले प्रमुख झालाई मासो दलेका हुन् । यस वर्षको शैक्षिक सत्र शुरु भएको लामो समयसम्म पनि पाठ्यपुस्तक उपलब्ध गराउन नसकेको भन्दै उनीहरूले प्रमुख झालाई कालोमोसो दलेको केन्द्रका एक कर्मचारीले बताएका छन् । 

आफूहरू पाठ्यपुस्तक बिक्रेता भन्दै कार्यालयमा प्रवेश गरेका उनीहरूले कार्यालय प्रमुखसँग कार्यकक्षमै विवाद गर्न थालेका थिए । विप्लव नेतृत्वको नेकपानिकट अनेरास्ववियू (क्रान्तिकारी) का उपाध्यक्ष नरेन्द्र विकले घटनाको जिम्मा लिएका छन् । दुर्व्यवहारपछि उनीहरू त्यहाँबाट फरार भएका छन् । प्रहरीले उनीहरूको खोजी गरिरहेको बताएको छ ।