घोषणा भइनसकेको प्रतिनिधि सभा निर्वाचनका लागि सबै दलका नेताले आफू अनुकूल निर्वाचन क्षेत्र छान्दै हिँडिरहेको समयमा नेकपा एमालेका ‘तेस्रो नम्बर’का उपाध्यक्ष रामबहादुर थापा ‘बादल’ भने गुमनाम छन् ।

बहालवाला सांसद र आकांक्षी नेताहरूले निर्वाचन क्षेत्रमा गएर चुनावी रणनीति बनाउन शुरू गर्दा बादल भने गुमनाम जस्तै छन् । 

नेकपा विभाजनसँगै माओवादी परित्याग गरेर एमाले रोजेका बादलले गृहजिल्ला चितवनमा पुगेर प्रत्यक्ष चुनाव लड्ने बताएका थिए ।

‘चुनाव घोषणा भइसकेपछि पार्टीले निर्णय गर्ला, त्यो स्थितिमा प्रचण्ड भर्सेस बादल हुन पनि सक्छ,’ २०७८ असोज ८ गते प्रेस चौतारीले चितवनमा आयोजना गरेको कार्यक्रममा बादलले भनेका थिए ।  

राजनीतिक स्टन्टका लागि चुनाव लड्ने बताएपनि स्वयं बादल भित्रैदेखि चुनाव लड्न तयार देखिएका छैनन् । ‘उहाँले अहिलेसम्म चुनाव लड्नका लागि कुनै रुचि देखाउनुभएको छैन, पार्टी उपाध्यक्षले चुनाव लड्छु भनेर रुचि देखाएको भए हामीले छलफल गर्ने थियौं,’ नेकपा एमाले चितवनका एक नेताले लोकान्तरसँग भने ।

चितवनका तीनवटै क्षेत्रमा एमालेका तर्फबाट उठ्ने नेताहरूले लबिङ शुरू गरिसकेका छन् ।

जनजाति भएकाले बादल प्रतिनिधि सभाको समानुपातिकतर्फ या राष्ट्रिय सभामै आउने सम्भावना रहेको एमाले नेताहरू बताउँछन् । 

‘कार्यकाल नसकिँदै उहाँलाई राष्ट्रिय सभाको सदस्य पदबाट हटाइएकाले उहाँलाई फेरि त्यही ठाउँमा ल्याउन प्रयास हुन्छ, व्यक्तिगत स्वभावको हिसाबले पनि उहाँ माथिल्लो सदनका लागि योग्य हुनुहुन्छ,’ चितवनका ती एमाले नेताले भने ।

माओवादीको महासचिव रहिसकेका बादल एमाले प्रवेश गरेपनि उनले कार्यकर्ता तान्न सकेका छैनन् ।

‘चितवनमा बादल एक्लैजस्तो हुनुहुनछ, बरू शिक्षण पेशामा संलग्न भएकाले नैनकला थापाको थोरबहुत प्रभाव छ,’ चितवनका ती नेताले भने ।

बादल मन्त्रीबाट हटेपछि उनले पत्नी नैनकलालाई केपी ओली सरकारमा सञ्चार मन्त्री बनाएका थिए ।

सर्वोच्च अदालतको आदेशबाट उनको मन्त्री पद १३ दिनमै चैट् भएको थियो । 

सहयोगीको दाबी– 'वाम गठबन्धन भए चितवन– २ बाट चुनाव लड्नुहुन्छ'

बादल स्वयंले प्रचण्डसँग चुनाव लड्ने बताएपनि उनका सहयोगीहरू वामपन्थी गठबन्धन बनेको अवस्थामा क्षेत्र नम्बर २ बाट चुनाव लड्ने बताउँछन् ।

बादल गृहमन्त्री रहेको समयमा उनको प्रेस सहयोगी रहेका किरण भट्टराईले चितवन २ बाटै चुनाव लड्ने बादलको इच्छा रहेको बताए । 

‘पहिला पनि चितवन २ बाट चुनाव जित्नुभएको हो, प्रतिनिधि सभा चुनाव लडेमा उहाँ अहिले पनि चितवन २ बाटै हो,’ भट्टराईले लोकान्तरसँग भने ।

२०७४ सालको चुनावमा चितवन २ बाट एमालेका कृष्णभक्त पोखरेल विजयी भएका थिए । पोखरेल अहिले पनि त्यो क्षेत्रका सशक्त उम्मेदवार हुन् । 

पढ्नुहोस् यो पनि :

प्रचण्डको गृह जिल्लामा रामचन्द्र पौडेलको चर्चा, एमालेले कसलाई उतार्ला मैदानमा ?

१५ वर्षअघि २०६४ सालमा भएको संविधान सभाको पहिलो निर्वाचनमा बादल चितवनको तत्कालीन क्षेत्र नम्बर २ बाट विजयी भएका थिए । 

त्यो बेला २१ हजार ४ सय ९ मत पाएर बादल विजयी हुँदा कांग्रेसका एकनाथ रानाभाटले १३ हजार र एमालेका काशिनाथ अधिकारीले ११ हजार हाराहारी भोट पाएका थिए । त्यो बेला ५ वटा निर्वाचन क्षेत्र रहेको चितवनमा अहिले तीनवटा मात्र निर्वाचन क्षेत्र छन् । 

२०७० सालको संविधान सभा निर्वाचनको समयमा भने उनी मोहन वैद्यको नेतृत्वको ड्यास माओवादीको महासचिव थिए । सो पार्टीले त्यो बेला चुनाव बहिस्कार गरेको थियो । 

२०७४ सालमा उनी बागमती प्रदेशबाट राष्ट्रिय सभा सदस्य बनेका थिए । माओवादीका तर्फबाट उम्मेदवार बनेका बादल एमाले जनप्र

पढ्नुहोस्, यो पनि :

बादललाई पत्रकारको अप्ठेरो प्रश्न- बयलगाडा चढेर अमेरिका पुगिँदैन भन्ने नेतृत्वको पार्टीमा...

प्रतिनिधि समेतको भोटबाट विजयी भएका थिए । २०७७ पुस ५ गते केपी ओलीले गरेको प्रतिनिधि सभा विघटनलाई समर्थन गर्दै तत्कालीन गृहमन्त्री थापा ओलीसँग लागेका थिए । 

सर्वोच्च अदालतको आदेशले नेकपा विभाजन भएर माआवादी र एमाले अलग भएपछि बादल एमालेतर्फ लागेका थिए । त्यसपछि माओवादीले उनलाई सांसदबाट हटाएको थियो । 

बादल हटेपछि रिक्त बनेको राष्ट्रिय सभा सदस्यमा कलम चिह्नबाट स्वतन्त्र उम्मेदवारी दिएका खिमलाल देवकोटा विजयी भएका थिए । सांसदबाट हटेपनि बादल ओली सरकारमा गृहमन्त्री रहेका थिए । 

गैरसांसदलाई मन्त्री बनाउन नमिल्ने भन्ने सर्वोच्चको फैसलाले बादल, टोपबहादुर रायमाझी, लेखराज भट्टलगायतको मन्त्री पद गएको थियो । 

गत मंसिरमा चितवनको सौराहमा भएको महाधिवेशनबाट एमालेको उपाध्यक्ष निर्वाचित भएपनि राजनीतिक रूपमा बादल भूमिकाविहीन जस्तै छन् । 

पार्टीको बैठक र केपी ओली उपस्थित हुने केही कार्यक्रममा देखिएपनि बादल लगभग गुमनाम छन् । मिडयामा बोल्न नचाहने उनका अन्तर्वार्ता पनि खासै आउँदैनन् ।

एमालेमा रोपिएको माओवादीको बिउ !

नेत्रविक्रम चन्द विप्लवको पार्टीका कार्यकर्तालाई पार्टी प्रवेश गराउने कार्यक्रममा बुधवार माआवादी केन्द्रका अध्यक्ष पुष्पकमल दाहाल ‘प्रचण्ड’ले एमालेभित्र माओवादीको बिउ रोपेको बताएका थिए ।

ओली सरकारमा तीन वर्ष गृहमन्त्री बनेका थापाले माओवादी जनयुद्धलाई बिर्सिसकेका छन् ।

धादिङमा आयोजित कार्यक्रममा बादलले गणतन्त्र एमालेका कारण आएको बताएका थिए । 

ओलीले प्रतिनिधि सभा विघटन गरेपछि आयोजना गरिएका सभामा सम्बोधका क्रममा बादलले प्रचण्डलाई ‘दक्षिणपन्थी अवसरवादी’को संज्ञा दिने गरेका थिए । 

प्रचण्डले एमालेभित्र रोपिएको माओवादीको बिउ भने पनि बादल, टोपबहादुर रायमाझी र लेखराज भट्टहरूले एमालेभित्र माओवादीको वकालत गर्ने सम्भावना न्युन छ ।