कागजात नियन्त्रणमा लिएर बैंक खातासम्म पहुँच पुर्‍याई ठगी गरेको आरोपमा एक व्यक्ति पक्राउ परेका छन् । काठमाडौं उपत्यका अपराध अनुसन्धान कार्यालयले व्यक्तिको बैंक खातासम्म पहुँच पुर्‍याई ठगी गरेको आरोपमा मकवानपुर जिल्ला हेटौंडा उपमहानगरपालिका १७ स्थायी घर भएका ४१ वर्षीय  गोपी बजगाईलाई पक्राउ गरेको हो । उनलाई बिहीवार काठमाडौं महानगरपालिका ३१ नयाँबानेश्वरबाट पक्राउ गरिएको प्रहरीले जनाएको छ । 

प्रहरीका अनुसार बजगाईले सामाजिक सञ्जाल फेसबुक र ह्वाट्स एपमार्फत एक व्यक्तिलाई वैदेशिक रोजगारीका लागि पोर्चुगल लैजाने आश्वासन दिई नागरिकता, राहदानी तथा सम्पत्ति विवरण खुल्ने अन्य कागजात हात पारेका थिए । त्यसपछि उक्त कागजागत प्रयोग गरेर उनले ती व्यक्तिको नाममा रहेको मोबाइलको सिमकार्ड पुनः निकालेर बैंक खातासम्म पहुँच पुर्‍याई रकम निकालेका थिए । उनले मोबाइल बैंकिङमार्फत् ती व्यक्तिको एनआईसी बैंकको खातामा रहेको ३ लाख ८६ रुपैयाँ आफ्नो खातामा सारेको उजुरी प्रहरीमा परेको थियो । 

उजुरीका आधारमा अनुसन्धान गर्दा उनले सामाजिक सञ्जालमार्फत कुराकानी गर्दा आफूले ग्यारेन्टीका साथ पोर्चुगल लैजाने त्यसका लागि ११ लाख रुपैयाँ लाग्ने बताएका थिए । उनले सुरुमा कुनै पनि रकम दिन नपर्ने, भिसा आएपछि मात्र लागत रकम बुझाउनुपर्ने भन्दै सामाजिक सञ्जालमार्फत् सम्पर्क भएका ती व्यक्तिलाई विश्वासमा लिएका थिए । 

प्रहरी उपरीक्षक कृष्णप्रसाद कोइरालाका अनुसार उनीबाट ठगिएका एक पुरुष व्यक्ति प्रहरीको सम्पर्कमा आएका छन् । अन्य धेरै व्यक्तिलाई उनले ठगी गरेको हुनसक्ने प्रहरीले जनाएको छ । पक्राउ परेका बजगाईलाई शुक्रवार जिल्ला प्रहरी परिसर काठमाडौं पठाइएको छ ।