थाई स्माइल एयरवेजले काठमाडौंदेखि बैंककसम्मको हवाई उडान सेवा शुरु गरेको छ । शुक्रवारदेखि काठमाडौं–बैंकक दुईतर्फी हवाई सेवा प्रारम्भ भएको हो । 

शुक्रवारदेखि नै दैनिक रूपमा काठमाडौँं–बैंकक हवाई सेवा सञ्चालन गर्ने थाई स्माइल एयरवेजले जनाएको छ । यस रुटको लागि तोकिएको एयरबस–३२० मा इकोनोमी क्लासमा १५० र प्रिमियम इकोनोमी क्लासमा १२ सिट गरी जम्मा १६२ सिटको क्षमता रहेको छ । जसमा अन–बोर्ड मिल सर्भिस(विमान भित्रै खानाको सुविधा) पनि रहेको कम्पनीले जनाएको छ । 

थाई स्माइलले थाइल्यान्डको फुकेट र पटायालगायत अन्य सम्पूर्ण आन्तरिक विमानस्थलहरूमा उडान भर्छ भने थाई एयरवेज इन्टरन्यासनलले अष्ट्रेलिया, जापान र क्वालालम्पुरजस्ता अन्तर्राष्ट्रिय गन्तव्यहरूमा सेवा प्रदान गर्दछ । 

आरआर ग्रुप अफ कम्पनीजअन्तर्गतको एक संस्था सोसाइटी इन्टरनेशनल ट्राभल सर्भिसेसले थाई स्माइल एयरवेजका लागि बिक्री, मार्केटिङ र एयरपोर्ट सञ्चालन सेवाको साथै सम्पूर्ण ग्राहक र एजेन्सी सपोर्ट सेवाहरू प्रदान गर्दै आइरहेको छ ।

थाई एयरवेज इन्टरनेसनल पब्लिक कम्पनी लिमिटेड (थाई) को सहायक वायुसेवा कम्पनी थाई स्माइल एयरवेजका कार्यवाहक प्रमुख कार्यकारी अधिकृत भिसेट सोन्तिचाइले भने, ‘काठमाडौं–बैंकक हवाई सेवाको शुरुवात गर्न पाउँदा हामी गौरवान्वित भएका छौँ । यसले निश्चित रूपमा बैंकक र एशियाका अन्य प्रमुख शहरहरूबीच बढ्दै गइरहेको हाम्रो सम्बन्धलाई अझै बलियो बनाउनेछ । हामीलाई विश्वास छ कि यो नयाँं यात्रुवाहक उडान सेवाले नेपाल–थाइल्याण्ड सम्बन्धमा अर्को सुनौलो आयाम थप्नेछ । साथै हामीलाई यो पनि विश्वास छ कि यस रुटको शुरुवातसँगै नेपाल विस्तारै मध्य–दक्षिण एसिया र अन्य एसियाली मुलुकहरूका लागि पनि पर्यटकीय आकर्षणको केन्द्र हुनेछ ।’

सोसाइटी इन्टरनेसनल ट्राभल सर्भिसेजका अध्यक्ष रविचन्द्र सिंहले सन् १९६८ देखि थाई एयरवेज इन्टरनेसनलले सेवा प्रदान गरेको रुटमा पुनः हवाई सेवा सुचारु गर्दै यसले नेपाल र थाइल्याण्डको सम्बन्ध अझ नजिक बनाएको बताए ।