नेपाली काँग्रेसको शेखर कोइराला समूहले सभापति शेरबहादुर देउवा सत्ता गठबन्धनको सभापति जस्तो भएको आरोप लगाएको छ । पार्टीका सभापतिको रुपमा नेता कार्यकर्ताले आशानुरुप भरोसा पाउन नसकेको शेखर पक्षको आरोप छ । शेखर पक्षले सरकार र पार्टी सञ्चालनका सन्दर्भमा ५ बुँदे निष्कर्ष निकाल्दै शुक्रबार बैठक सम्पन्न भएको छ । 

बैठकपछि नेता गोविन्दराज पोखरेलले पार्टी विधिविधानअनुरुप चल्न नसकेको, सरकारले सुशासन दिन नसकेकोलगायतका ५ बुँदे निष्कर्ष बैठकले निकालेको जानकारी दिए । 
उनका अनुसार शेखर समूहले सरकार सञ्चालनका विषयमा गम्भीर असहमति जनाएको छ । तत्कालीन केपी ओली सरकारलाई विस्थापन गरेर देउवाको नेतृत्वमा सरकार बनेपछि जनताले जनजिविकाका सवालमा तथा अर्थतन्त्रका सूचक सुधारलगायतका सवालमा सकारात्मक नतिजा पाउने अपेक्षा गरेपनि सो अनुसार हुन नसकेको शेखर समूहको निष्कर्ष छ 

यस्तै सुशासनको विषयमा सरकारले जुन प्रतिबद्धता जनाएको थियो सो अनुरुप सरकारले काम गर्न नसकेको शेखर समूहको निष्कर्ष छ। सम्पत्ति शुद्धीकरण विभागलगायतका निकायहरु अहिले पनि प्रधानमन्त्री कार्यालय मातहत हुनु सही नभएको पोखरेलले बताए । 

यस्तै बजेट बनाउनेदेखि अनेक विषयमा आर्थिक विचलन र नीतिगत भ्रष्टाचार देखिएको शेखर समूहको निष्कर्ष छ ।  यस्ता कार्यलाई तत्काल नियन्त्रण गरिनुपर्नेमा शेखर समूहले जोड दिएको छ । 

पराष्ट्र नीति सबैको साझा बन्नुपर्नेमा पनि बैठकले ध्यानाकर्षण गराएको पोखरेलको भनाइ छ । पोखरेलले सभापति देउवा गठबन्धनको सभापति जस्तो भएर हिँडेको भन्दै  उनले पार्टी अभिभावकका अनुभूति दिलाउन नसकेको निष्कर्ष बैठकले निकालेको बताए । बैठकले गाउँगाउँसम्म परिचालित भएर काँग्रेसलाई बलियो बनाउन लागिपर्ने निर्णय पनि गरेको छ ।  बिहीबारदेखि सुरु भएको बैठकमा उपसभापति धनराज गुरुङ, महामन्त्री गगन थापालगायतका शेखर समूहका नेताहरुको सहभागिता रहेको थियो ।