अभिनेता अनमोल केसी र अभिनेत्री पूजा शर्माले चलचित्रमा एकसाथ काम गर्ने भएका छन् ।

यी दुवैले चलचित्रमा पहिलोपटक सहकार्य गर्न लागेका हुन् । अभिनेत्री शर्माको आफ्नै होम प्रोडक्सनबाट बन्न लागेको चलचित्रका लागि अभिनेताको रूपमा अनमोल केसी अनुबन्धित भएका हुन् ।

अभिनेत्री शर्मा स्वयंले फेसबूकमार्फत् जानकारी दिएकी छन् । चलचित्रलाई निर्देशक सुदर्शन थापाले निर्देशन गर्नेछन् ।

अभिनेत्री शर्माले आफ्नै होम प्रोडक्सनबाट चलचित्र निर्माणको प्रक्रिया आरम्भ गर्दै गर्दा मनमा डर र उत्साह दुवै रहेको बताएकी छिन् । उनले यसपटक आफू निर्मात्रीको रूपमा प्रस्तुत हुने जनाउँदै यो आफ्नो सपनाको प्रोजेक्ट रहेको बताउँछिन् । 

‘मेरो सपनाको प्रोजेक्टमा जोडिन आइपुगेका प्रिय नायक अनमोल केसीको साथले झनै उत्साह मिलेको छ,’ अभिनेत्री शर्माले भनेकी छन् । अनमोल र पूजाले यसअघि पनि केही चलचित्रमा एकसाथ काम गर्ने जमर्को गरेका थिए तर सफल हुन सकिरहेको थिएन । 

अभिनेत्री शर्माले आफूहरू सधैं दर्शकलाई प्रेम कथामा नयाँ आयाम दिने कोसिसमा हुने र यसपटक पनि त्यही कोसिस जारी रहने बताएकी छन् । 

नेपाली चलचित्रमा अनमोल अहिलेका सर्वाधिक सफल अभिनेता मानिन्छन् । यता पूजा प्रेम कथानक चलचित्रमा रुचाइएकी अभिनेत्री हुन् । सुदर्शन लभस्टोरी चलचित्र निर्देशनमा रुचाइएका निर्देशक हुन् । यी तीनैको सहकार्यलाई चलचित्र क्षेत्रमा चासोका साथ हेरिएको छ ।