जनता समाजवादी पार्टी (जसपा) अध्यक्ष उपेन्द्र यादवले सरकारमा सहभागी तीन मन्त्रीलाई फिर्ता बोलाएर नयाँको नाम सिफारिश गरेका छन् ।

संघीय मामिला तथा सामान्य प्रशासन मन्त्री राजेन्द्र श्रेष्ठबाहेक तीनै जना मन्त्रीलाई फिर्ता बोलाइएको जसपा स्रोतले बतायो । 

यादव निकट स्रोतका अनुसार भौतिक पूर्वाधार मन्त्रीमा इस्तियाक राई, वन मन्त्रीमा प्रदीप यादव र कृषि मन्त्रीमा मृगेन्द्र सिंहको नाम सिफारिश गरिएको छ । यसअघि मन्त्री नबनाएको भन्दै प्रदीप यादव समूहले वीरगञ्जमा उपेन्द्रविरुद्ध नाराबाजी गरेका थिए । 

पार्टी विवादमा बाबुराम भट्टराई पक्षमा रहेका प्रदीप र इस्तियाक राई उपेन्द्र समूहमा फर्केलगत्तै मन्त्रीमा सिफारिश भएका हुन् । यादवले नयाँ मन्त्रीको नाम प्रधानमन्त्रीलाई दिएका छन् । 

आजै (सोमवार) अपरान्ह साढे ४ बजे शपथ हुने राष्ट्रपति कार्यालय स्रोतले जानकारी दिएको छ । 

भौतिक पूर्वाधार मन्त्री रेणु यादव, कृषि मन्त्री महेन्द्र यादव र वन मन्त्री रामसहायप्रसाद यादवलाई फिर्ता बोलाइएको छ । अघिल्लो साता मात्र नेकपा एकीकृत समाजवादीका मन्त्रीहरू फेरिएका थिए । 

मन्त्रीमा सिफारिस भएका मृगेन्द्र सिंह र प्रदीप यादवले शपथबारे अहिलेसम्म खबर नआएको लोकान्तरसँग बताए ।