बजेट निर्माणको क्रममा असम्बन्धित व्यक्ति सहभागी भएको भन्ने आरोप सम्बन्धमा संसदीय छानबिन समिति गठन गर्न दलहरू सहमति नजिक पुगेका छन् । 

सभामुख अग्नि सापकोटाको कार्यकक्षमा बुधवार भएको छलफलपछि आरोप सम्बन्धमा संसदीय छानबिन समिति गठन गर्ने तयारी भएको हो । 

सभामुखको कार्यकक्षमा गृहमन्त्री बालकृष्ण खाण, माओवादी संसदीय दलका मुख्य सचेतक देव गुरुङलगायतले छलफल गरिरहेका छन् । 

संसदीय छानबिन समिति गठनको गृहकार्यपछि बिहान ११ बजेका लागि बोलाइएको प्रतिनिधि सभाको बैठक दिउँसो २ बजेसम्मका लागि सूचनामार्फत् स्थगित गरिएको छ । सभामुख सापकोटाले समिति गठनको गृहकार्य गर्न सचिवालयलाई निर्देशन दिएको स्रोतले बतायो । 

‘९ या ११ सदस्यीय छानबिन समिति गठनको गृहकार्य भइरहेको छ,’ सचिवालयका एक अधिकारीले लोकान्तरसँग भने । 

अर्थमन्त्री जनार्दन शर्माले बुधवार नै प्रतिनिधि सभा बैठकमा सम्बोधन मार्फत आफ्ना कुरा राख्ने तयारी गरेका छन् । 

संसदीय समिति गठनमा सहमति भएमा २ बजेपछि बस्ने प्रतिनिधि सभा बैठकमा सभामुख सापकोटाले समितिमा रहने सदस्यहरूको नाम सुनाउने सचिवालय स्रोतले बतायो ।