बैंक तथा वित्तीय संस्था एक-आपसमा गाभिने क्रम पछिल्ला दिनमा वृद्धि भएको छ। नेपालको बैंकिङ इतिहासमा विशिष्ठ पहिचान बनाएको नबिल बैंकले अर्को ‘क’ वर्गको बैंक नेपाल बङ्गलादेश बैंकलाई गाभेको छ।

एक-आपसमा गाभिएका बैंकले ‘नबिल बैंक लिमिटेड’ को नाममा यही असार २७ गतेदेखि एकीकृत कारोबार गर्ने भएको छ। नेपाल राष्ट्र बैंकको नियमन विभागले सो बैंकलाई यही असार २७ गतेदेखि एकीकृत कारोबारका लागि अनुमति प्रदान गरेको छ।

‘बैंक तथा वित्तीय संस्था एक-आपसमा गाभ्ने÷गाभिने (मर्जर) तथा प्राप्तिसम्बन्धी नियमावली, २०७३ बमोजिम’ केन्द्रीय बैंकले एक सूचनामार्फत जानकारी दिएको हो। यही असार १५ गते मात्रै केन्द्रीय बैंकले एकीकृत कारोबारका लागि अन्तिम अनुमति दिएको थियो। सोही अनुमतिका आधारमा नेपाल बंगलादेश बैंकको सम्पूर्ण दायित्वसमेत अब नबिल बैंकले लिने भएको छ।

नबिलले नेपाल बङ्गलादेश बैंकलाई प्रतिशेयर रु.४३ का दरले गाभेको हो। यस्तै अन्य बैंक तथा वित्तीय संस्थाले पनि एक-आपसमा गाभिने सम्झौता गरिसकेका छन्। ग्लोबल आइएमई बैंकले बैंक अफ काठमाण्डू बैंक गाभ्ने सम्झौता गरिसकेको छ।

त्यस्तै हिमालयन बैंक र सिभिल बैंकले एक-आपसमा गाभिने अन्तिम तयारी गरिरहेका छन्। असार मसान्तभित्रै अन्य बैंकले समेत एक-आपसमा गाभिने तयारी गरेका छन्। नेपाल राष्ट्र बैंकको नीतिअनुसार नै बैंक तथा वित्तीय संस्था एक-आपसमा गाभिनका लागि आवश्यक सहमति गरेका छन्। धेरै बैंक तथा वित्तीय संस्था हुनुभन्दा कम संख्यामा गुणस्तरीय सेवा प्रदान गर्ने संस्था राख्ने सरकारको योजना रहेको छ। रासस