नेकपा माओवादी केन्द्रका अध्यक्ष पुष्पकमल दाहाल प्रचण्डले आसन्न प्रतिनिधि सभा निर्वाचनका लागि समयमै घोषणापत्र बनाउने बताएका छन् ।

त्यसका लागि हेडक्वार्टरमा सुझाव दिन उनले पार्टीका केन्द्रीय सदस्यहरूलाई आग्रह समेत गरे ।

'अघिल्लोपटक चुनावी अपीलको प्रचार भएन, यसपटक समयमै घोषणा पत्र तयार गर्ने सोचिएको छ,' प्रचण्डले भने, 'जनतालाई माओवादीले दिन खोजेको के हो भनेर बुझाउन एउटा मस्यौदा समिति बनाउँछौँ । त्यसमा छलफल र परिमार्जन गरेर घोषणापत्र बनाउँछौं ।'

स्थानीय तहको निर्वाचनमा माओवादीले घोषणापत्र बनाएको थिएन । घोषणा पत्र नबनाएको विषयलाई लिएर एमाले अध्यक्ष केपी शर्मा ओलीले पटक-पटक कटाक्ष गरेका थिए ।